StarTalk｜酒井法子久違多時再開香港騷 難忘歌迷五年前用心製造驚喜

酒井法子久違五年即將再喺香港開騷，呢日佢接受TVB娛樂新聞台節目《StarTalk》訪問，為七月舉行嘅演唱會做宣傳。

酒井等咗五年終於可以見香港歌迷，佢嘅心情特別興奮期待，呢段日子令佢最念念不忘嘅就係五年前開騷時，歌迷為佢揮動手燈應援、又為佢舉起應援橫幅嘅一幕，呢份心意使酒井感到非常感動驚喜。

香港美食多不勝數，酒井就話每次嚟香港都最愛品嚐蛋撻，只可惜呢次因行程緊迫，未有時間好好遊玩一番。酒井五年前開騷就用《MISS YOU》做主題，希望演唱會好似聚會咁同粉絲見面。

而早喺完騷後一兩年，酒井已想再嚟香港開新演唱會，可惜當時遇到疫情肆虐，令大家正常生活同娛樂工作遇到好大困難，直到疫情終於過去，酒井感受到香港歌迷對佢嘅呼喚，所以就有咗呢次以《MY DEAR》做主題嘅演唱會。雖然酒井而家仲未諗好到時要帶咩驚喜俾大家，不過佢就話因為每次嚟香港被問會唔會唱廣東歌，所以開始認真考慮要唱喇！
 
雖然酒井已經年過五十，但保養得宜令佢成為凍顏美魔女，佢就話自己可以Keep住靚樣，主要係靠健康生活、早睡早起同多做運動；講到同兒子嘅相處方式，酒井就話二人關係融洽，無話不談。雖然阿仔已出社會工作，所以冇暑假，不過佢好希望阿仔呢次嚟睇佢嘅演唱會。