麥明詩簽字正式出嫁 戶外場地派對盛勁為深情唱《無賴》

麥明詩 同 盛勁為 經過盆菜宴同遊艇會兩晚嘅慶祝，宴請唔同親友出席之後，29號再舉行戶外結婚派對，一對新人以西式禮服出席，喺雙方親友見證之下簽字正式成為夫妻。

Louisa以露肩婚紗由挽住爸爸嘅手出嫁，現場氣氛溫馨感人，而盛勁為出場時就表情輕鬆。儀式完結後除咗傳統拋花球環節之外，新人又開香檳與眾同樂。

呢日唔少圈中好友都應邀出席，其中已懷孕8個月嘅 朱千雪 同老公、劉倩婷 、黃嘉雯、王嘉慧、梁凱晴等都有到賀。挺巨肚現身嘅千雪，自然成為新人之外嘅另一焦點，而仲有網民指估計佢呢胎係陀男嬰咁話。

行禮之後同場舉行晚宴，一對新人再喺親友包圍之下接受祝賀，新郎哥仲開口獻唱一曲《無賴》，企喺第一排望實老公聽得如痴如醉嘅新娘子，仲喺賓客歡呼之下上台熱情擁吻，呢對新婚夫妻真係甜到甩牙呀。