聲夢1+2畢業生玩轉香港澳門 炎明熹7度低溫型格戰衣獻唱

《聲夢傳奇》家族首個音樂綜藝《聲夢1+2》將於今晚（30日）於翡翠台首播。節目主持森美召集《聲夢》兩季畢業生齊齊玩音樂兼玩遊戲，仲會衝出香港玩到去澳門！此外，節目每集均會邀請「Sing」級外援嘉賓，同一班《聲夢》畢業生玩到癲！
 
首集內容豐富又爆笑，《聲夢》畢業生分成兩隊大比拼，分別係紅隊嘅 Aska（張馳豪）、火雞（孫漢霖）、Rock（何晉樂）、Felix（林智樂）、Desta（李茵彤）、Vivian（江廷慧）、Aeren（文凱婷）同Venus（林沚羿），對戰藍隊嘅Janees（黃洛妍）、Sherman（潘靜文）、Duncan（侯雋熙）、Zayden（彭家賢）、Angel（劉詠彤）、Aster（劉芷君）、Pamela（趙小婷）同Crystal（梁芷菁），紅、藍隊並分別請來谷婭溦、糖妹擔任嘉賓齊齊玩轉澳門。

《聲夢1＋2》今晚翡翠台首播，兩季成員將會分組大鬥法
 
今集重頭戲落喺人氣王炎明熹（Gigi）身上，Gigi現身澳門同澳門科技大學中樂團合作演出。據知錄影當日氣溫只得7度，但Gigi為咗配合中樂主題，專登以黑色中式露背戰衣上陣，大晒型格風仙氣，亦突顯Gigi嘅專業態度！Gigi獻唱劇集《新聞女王》插曲、中樂版《Crytsal Clear》，令人聽出耳油；Gigi獻唱完畢返回座位後即刻著返招牌「熊啤啤」毛毛長外套保暖，盡顯少女心！之後紅、藍兩隊上演大對決，藍隊嘅糖妹、Sherman、Duncan、同Zayden獻唱西樂版《大會堂演奏廳》，對戰紅隊嘅谷婭溦、Felix、Desta、同Vivian獻唱中樂版《逃生門》，兩隊演出各有韻味，想知道到底最終邊隊獲勝？節目自有分曉！

紅藍兩隊將會進行分組大對決對底邊隊技高一籌呢？
 
遊戲環節同樣精彩，熱身遊戲「你估我唔到」笑料十足，玩法係每隊派一個人負責估，另一隊人就要瘋狂扮聲，務求令估嘅人認唔出自己；平時斯斯文文嘅Janees大晒反差萌、扮雞仔聲驚為天人，而被估中嘅隊員就會被隊友懲罰，場面過癮！

雖然錄影當日天氣寒冷，不過Gigi仍以露背戰衣上陣
 
澳門方面同樣好玩，谷婭溦、糖妹同一班《聲夢》畢業生玩得不亦樂乎，遊戲「80秒輪住跳」中，每隊隊員接力跳舞，最後一位隊員要以最接近目標時間80秒完成演出，較接近目標時間完成指令隊伍將為之勝出。各人按照唔同年代以及類型歌曲，配合搞笑舞姿勁舞比拼一番，火花十足！

記得今晚20:00翡翠台準備收睇喇！
 
溦溦同糖妹又分別化身「好勝魔人」同「運氣王」大激鬥，溦溦過程中更遭狠批「聲大冇準」，想知二人究竟幾咁有綜藝喜感，就要留意今晚首播嘅《聲夢1+2》。

《聲夢1+2》今晚起 逢星期六晚 20:00 翡翠台