福祿壽訓練學院｜扮嘢學院今晚正式開學 王祖藍神還原「癡情基」惹爆笑

由 阮兆祥 李思捷 王祖藍 主持嘅香港首個扮嘢真人Show《福祿壽訓練學院》將接棒《中年好聲音2》強勢推出，並於今晚首播。為咗令觀眾更快更全面了解入圍者，第一至第三集嘅節目時長足足1.5小時，直到第4集就會回復1小時播映時間。

扮嘢形象深入民心嘅福祿壽，將會喺全新節目升呢導師，分別變成Professor Fuk（阮兆祥）、Professor Luk（王祖藍）同Professor Sau（李思捷），喺50名入圍者中挑選最具潛質同實力嘅扮嘢王成為頂級接班人。

Professor Fuk 阮兆祥

一心想將扮嘢精神發揚光大嘅三子，同製作組精心炮製以「扮嘢史」為主題嘅開場片，片段中三子分別以六個唔同造型上陣，由粵語片年代開始分析同解構香港扮嘢史，片段中除咗有三子落力扮鬼扮馬，仲夾雜大量TVB昔日經典扮嘢場面，好似有盧海鵬惡搞「成年版欣宜」、陳山聰入行初期扮演劉華嘅珍貴片段，仲有鄭少秋扮嘢才藝放送。有「扮嘢秋」之稱嘅秋官，當年先後扮過Michael Jackson、張學友、郭富城、劉德華以及草蜢等，當中「真永遠劉華」嘅神還原度更係令人拍案叫絕。

Professor Luk 王祖藍

相隔6年再度合體參與無綫綜藝節目製作嘅三子，絞盡腦汁為節目Opening表演獻上以城中話題人物為藍本嘅全新扮嘢造型「癡情基」、「美B」同「光B」。三個造型之中，以祖藍嘅「癡情基」最為吸睛，無論髮色、髮型、眼鏡、衣著、甚至係手中嘅白色膠袋，均神還原本尊；更令人驚艷嘅係，「癡情基」另一半Quiz Wong雖由靚女Dancer扮演，但該名Dancer同樣甚有扮嘢天份，完全神倒模本尊！
 
除咗導師，兩位「扮工室助理」陳懿德同郭珮文（Juliana）亦施展渾身解數發放笑彈，身為「東張女神」之一嘅德德，放低港姐包袱畫綠面扮竹之餘，由於肩負「龐然大竹」，由出場開始已處處碰壁；至於Juliana同樣搞鬼，首度擔任節目主持嘅佢，幾次出現語障慘況，要德德幫手解圍，祖藍仲講笑話：「你嗰啲唔係講解，係翻譯，我唔係好聽得明佢（Juliana）講乜。」

Professor Sau 李思捷

成功殺入首個海選回合嘅50位入圍者，將輪流上場獻技，50位入圍者嘅出場次序，將由三位導師「盲選」決定，換言之三子能否揀中心水選手可謂全靠運氣，喺首集「海選24強」中，3位導師各有8次揀心水選手機會，首集高質選手相當多，除咗有還原度勁高嘅郭富城、黃家駒、林峯、羅志祥同龍婷，仲有爆笑版張國榮、青春版Lady Gaga、泥漿版高海寧、有多年演出經驗的「舞」林高手，以及「扮聲王」。

多年來嘅唔少扮嘢經典片段都會喺節目中重現

其中一名男參賽者陳柏曦，先後一人扮勻劉德華、林峯、張學友、譚詠麟、黎明、郭富城等，更獲祖藍激讚「佢直頭係xx李思捷！」期待值爆燈。雖然精英雲集，可惜思捷卻連環「中大伏」，不斷揀中「最惡搞零潛質」入圍者，飽受祖藍同祥師兄嘲笑，甚至一度激氣到追打祖藍，場面爆笑。

首集嘅「既驚嚇又驚喜」選手亦唔少，最經典嘅有「比卡超走音王」、「無厘頭假髮男」同「醬爆亂舞王」，眾人表現嚇到思捷一度唔識反應。想知道班選手有幾驚喜同驚嚇，敬請密切留意今晚首播嘅《福祿壽訓練學院－海選24強》。

《福祿壽訓練學院》逢星期日晚 20:30 翡翠台