馬德鐘同劇中囝囝情同真父子 劉宸熙賣口乖向視帝爸爸偷師

馬德鐘 喺現實生活中同囝囝 馬在驤 情同兄弟，兩父子仲經常一齊出席活動，而喺啱啱播畢嘅劇集《再見·枕邊人》入面，佢同劇中囝囝童星 劉宸熙 同樣感情好好，無論戲內戲外都好似糖黐豆咁！馬神話兩父子感情好到冇辦法分開，就連等埋位休息時都要攬住個仔呀！

馬神話活力十足嘅熙熙，為劇組帶嚟唔少歡樂，但係一埋位嘅時候，呢位小演員就即刻表現出專業嘅一面，就連貴為視帝嘅馬神都大讚熙熙好戲又專業，而熙熙亦都大賣口乖話想同馬神爸爸偷師，希望以後都可以做視帝喎！

而張曦雯同樣對熙熙有讚冇彈，佢仲講笑話一見到熙熙就好似見到自己心愛嘅寵物，忍唔住想攬住佢，不過就算大家戲外玩得幾開心，只要一埋位，熙熙就會即刻入戲，真係非常專業呀！