崔智友狀態回勇keep住女神封號 李寶英新劇同金秀賢打對台

韓國女神 崔智友 年屆48歲，一直被視為凍零美魔女嘅佢，近日就被網民貼出近照，話佢嘅靚樣經唔起歲月洗禮，不過崔智友心情似乎唔受影響，呢日佢火力全開盛裝出席活動，睇上去精神奕奕狀態大勇，無論容貌同氣質都依然一流，直接用行動話俾大家聽，女神之名依然Keep得住呀！

崔智友年初宣布會離開合作10年嘅經理人公司YG，最近佢正式簽約新東家，Fans都希望好快可以見到佢嘅新作品。

而同場出席活動嘅仲有另一位凍齡女神李寶英、Krystal鄭秀晶、男團ENHYPEN嘅JAY同羲承等。李寶英相隔一年回歸公仔箱嘅驚悚新劇，咁啱同金秀賢主演嘅人氣韓劇打對台，不過李寶英嘅作品向來都有收視保證，加上兩套劇完全唔同類型，相信李寶英應該都對新作好有信心。