陳寶珠為粵劇後輩打氣 梁非同高台拱橋後翻嚇親安德尊

新編粵劇《白蛇‧許仙情越千年》喺31號晚舉行尾場，而喺30號晚嘅演出，就吸引到陳寶珠、安德尊、楊偉誠同太太張德蘭等到場，寶珠姐仲專登去到後台幫花旦梁非同打氣，佢又讚非同以及演法海嘅符樹旺演出得相出色，同時亦指呢次武場與科技嘅融合相當有新意。
陳寶珠去到後台為梁非同打氣。
而大王就表示自己係為梁非同而來，皆因之前曾經訪問過對方，令佢好欣賞梁非同學習粵劇嘅心態，大王指粵劇要栽培人才係件難事，所以當知道梁非同係主動去學粵劇而感到難得。
安德尊話自己係為梁非同而嚟。高難度動作，觀眾切勿模仿。
大王又指以前睇粵劇會自覺得好抽象，好多睇唔明，但而家有咗科技就幫到好多，當佢見到梁非同飾演嘅白素貞變成蛇時，真係有一條蛇喺畫面上呈現出嚟，令佢覺得好震撼，同時亦增廣見識。呢幕嚇親大王。

至於講到劇中梁非同因為盜仙草而向後彎腰喺高處落嚟一幕，大王就話睇到驚驚呀：「啪一聲跌落去真係有啲心痛！一位年輕嘅小妹妹可以咁高水準嘅演出，粵劇真係後繼有人，可以有新人承傳下去係好開心，而另一場見到梁兆明被白蛇嚇死，兆明嘭一聲向後跌落地，亦都嚇我一驚。」

好大條白蛇。