張國榮離世21載｜唐唐Post舊片7600日哀思未減 倪詩蓓憶友通知怒斥玩笑過火

4月1號係 張國榮 離世21周年，去年唔少大型紀念活動令唔少「哥」迷重溫哥哥華麗又璀璨嘅一生，而一直都低調紀念摯愛嘅 唐鶴德 亦喺社交平台出Post悼念，一句「今天是復活節 真的嗎？」加上《阿飛正傳》嘅哥哥影片，經典對白：「我咩都唔想要，我剩係要你留低」，更引發大家嘅無盡哀思。

唐唐短短數字就已道出對哥哥無盡思念

《阿飛正傳》嘅一世經典對白，令唔少哥迷都非常錐心

早喺日前復活節假期，哥哥出事地點嘅酒店外，已經有哥迷獻花悼念，今日傍晚亦將有悼念儀式。

陳淑芬貼出哥哥舊照，又指一系列活動會紀念故友

至於當年曾同哥哥拍拖嘅 倪詩蓓 近日接受電台訪問，亦回憶當年兩小無猜嘅相處，身為哥哥初戀女友嘅Annie，雖然最後感情未能開花結果，不過2003年事發之後，朋友通知時自己以為惡作劇而怒火中燒：「我收到電話，嗰日係4月1號，我以為講笑，所以好嬲。我同我朋友講：『你無啦啦點解要講佢，同埋講呢啲咁嘅玩笑。』之後睇新聞先證實。喺我心目中，哥哥只係出咗國，去咗第二個地方。」佢又婉惜指哥哥當年曾送過一隻戒指俾自己，可惜因多次搬屋，早年已經遺失。

哥哥當年女友倪詩蓓亦回憶起唔少點滴