吳業坤事隔5年再出新碟 商場簽唱感激歌迷不離不棄

吳業坤 相隔咗足足5年之後，近日終於再推出新專輯，呢日佢就喺商場舉行簽名會，為一直支持自己嘅歌迷簽名唱歌同玩遊戲喇。月中就踏入34歲嘅坤哥，仲獲Fans送上蛋糕為佢預祝生日，佢亦獻唱多首歌曲答謝。

5年時間一啲都唔短，坤哥就對歌迷對自己不離不棄支持自己覺得非常感動，佢又話正值長5期大量港人出遊下仲有咁多朋友賞面捧場，就更加高興喇。坤哥生日過後就會飛往日本為新碟嘅歌曲拍MV，不過就竟然冇預日籍太太同行，佢就解釋新碟以日式風格做主調，又因為時間緊迫，所以就唔會夫妻同行喇。

就快結婚兩年嘅佢，相信不時都會被追問幾日生小朋友，但係坤哥呢日就話暫時都未有計劃，因為希望再衝刺事業先，加上夫妻經常周圍飛，所以就等穩定先再算咁話。