KCON首度香港舉行韓團來襲 aespa預告6月開騷加緊準備中

一個年度大型韓流音樂節喺長假期周末首次於香港舉行，多隊K-Pop人氣組合都有來港參與演出，好似熱爆女團aespa、Highlight、Viviz、Sistar19、WayV、BoyNextDoor、ATEEZ、Tempest、Zerobaseone等，分別喺兩日活動中同Fans見面。

雖然aespa今次行色匆匆，不過6月佢哋就會正式來港開騷，佢哋仲指非常期待呢次首度香港演出呀。而孝琳同寶拉重組而成嘅Sistar19，就以充滿女人味嘅打扮現身，重組後首次於香港演出嘅佢哋，仲為香港歌迷特別準備。

成團踏入第6年嘅ATEEZ，以非常有活力嘅姿態同整齊舞步為歌迷演出，佢哋仲為3號生日嘅成員星化預祝生日，同歌迷齊齊唱生日歌為佢慶祝。至於出道已經15年嘅Highlight，就對歌迷多年來一直嘅支持非常感恩，仲話成員都會繼續為大家而努力呀。