福祿壽訓練學院｜Gordon演出獲好評 獲小豬本尊打氣 同Jackson識於微時

由 阮兆祥 李思捷 王祖藍 主持嘅香港首個扮嘢真人Show《福祿壽訓練學院》，首集播出後喺網絡引起極大迴響，當中憑「男神混合體」超強顏值、兼極速變聲變Tone扮演六大天王級歌手贏盡掌聲嘅「新會華Dee」 陳柏曦 ，更成為一眾參賽者嘅爆Reel王，短片上載短短一天（截至4月2日早上10點）已收獲逾63.9萬Views，總Like數高達逾90000之餘，相關短片分享次數更高達1400多次，足證人氣超旺！
 
另一表現優異嘅「大坑小G」 葉泓聲 ，亦贏得唔少網民支持同關注：「Gordon真係愈嚟愈進步」、 「真可惜，又靚仔、又跳得，畀機會他吧」。除咗網民給予正評，Gordon模仿嘅羅志祥（小豬）本尊亦有作出回應，除咗喺Gordon上載嘅表演片段留言打氣，仲喺IG Story轉發咗Gordon嘅表演短片兼留言打氣：「不要害怕被別人否定，最怕的是，自己先否定了自己，勇敢的去享受舞台，我們一起加油。」對於獲小豬本尊親自打氣，Gordon大嘆「超乎想像」，並一再強調好感動：「真係好開心，估唔到小豬真係注意到我，仲私信我為我打氣、鼓勵我，又讚我跳得好好，真係幫我注下咗一支好大嘅強心針。」Gordon又話小豬絕對是其偶像之一：「小豬本身模仿都好叻，唱歌、跳舞同主持都一樣叻，我都想自己做到佢咁叻！」Gordon預告之後仲會模仿更多不同類型嘅跳唱歌手，萬勿錯過。

小豬本尊回應Gordon嘅模仿片段
 
唔講唔知，Gordon同佢嘅三位偶像小豬、郭富城同王嘉爾都甚有淵緣，先講小豬，Gordon曾於日本旅行期間偶遇對方，當時由於太興奮，Gordon忍唔住大聲高呼對方名字，而小豬亦好親切地停低同Gordon合照，令Gordon開心到手震。至於城城，原來Gordon係受城城啟發18歲時加入Dancer行列，19歲時正式成為城城演唱會dancer，並為對方伴舞長達5年。更令人意外嘅係，Gordon同韓國男團GOT7香港成員王嘉爾（Jackson）識於微時，二人為同校同學，因為同樣鍾意跳舞而成為好友，Gordon大讚Jackson零架子：「佢係一個非常之好嘅人，去到依家佢所有嘅騷都會預位畀我睇，甚至乎會預埋我屋企人，佢紅咗都冇忘記身邊嘅朋友以及同學。」

Gordon早年加入舞蹈員行列，曾為天王郭富城嘅演唱伴舞
 
雖然自天堂鳥解散後Gordon已少有喺舞台上演出嘅機會，不過佢私下從未真正放棄，更一直默默地努力增值自己，希望有派上用場嘅一日：「呢段時間我有Keep住去跳舞同埋上堂學唱歌，咁樣到真係有機會表演嘅時候，就可以以更佳狀態去完成。而我每一次收到劇本，我都會約朋友出嚟傾吓應該點樣演，我好多謝袁偉豪，佢會教我點樣去演戲，同埋點樣去做好同埋分析個角色。Gordon話同袁偉豪因合作《法證先鋒V》結緣，由於二人志趣相投，加埋差唔多時間升呢人父，所以特別投契，Gordon話：「《法證V》係我第一部劇，所以拍嗰時係咁問阿Ben意見點可以演好啲，佢好好，好耐心咁教我，之後仲搵我做《好聲好戲》partner。」

Gordon亦係王嘉爾嘅同學兼好友
 
Gordon又笑言雖然喺娛樂圈浮沉多年總有想過放棄，但最後永遠喺自己最失意時、總有意料之外嘅機會降臨：「其實呢10年娛樂圈生涯，都嘗試過好幾次想放棄，但最後都做唔到，呢個圈係有一個魔力，當你想放棄嘅時候，永遠有啲嘢拉番你返嚟、繼續俾你去試。」

《福祿壽訓練學院》逢星期日晚 20:30 翡翠台