張國榮離世21載｜生前好友靈前拜祭 陳淑芬率哥迷默哀悼念

「哥哥」 張國榮 離世21周年，佢生前好友 陳淑芬同兒子 陳家豪 一早就聯同「哥哥」好友 連炎輝、前助手Kenneth，仲有近5百位香港、內地、日本、韓國、馬來西亞同澳洲等地嘅「哥」迷，一同喺寶福山向「哥哥」致祭。陳太又印製「哥哥」明信片送予「哥」迷感謝大家嘅愛意。

大批海外歌迷分別來港向哥哥致祭

之後陳太就轉赴澳門，出席佢入行50周年紀念展嘅特別活動，包括：《霸王別姬》電影放映會、《繼續寵愛．二十年．音樂會》放映會同《繼續寵愛．二十一年》悼念儀式。陳太又於傍晚哥哥離世時間，同現場「哥」迷們一齊默哀，大家又合唱《共同渡過》紀念。

陳淑芬親手佈置現場，讓來自唔同地區嘅歌迷向哥哥送上思念

陳太籌備嘅《陳淑芬．星星相識50年．紀念展》正於澳門舉行，分享佢多年來任職演出行業嘅點滴，而佢同張國榮嘅合作對香港演藝發展佔非常重要位置，紀念展亦設有專區展示張國榮嘅演藝作品，自開展以來，參觀過嘅各地「哥」迷都對豐富展品讚嘆不已。

陳淑芬嘅紀念展亦同哥迷一齊哀悼離世21周年嘅哥哥