勁離奇！《愛‧回家》風少陳浚霆咖啡店儲值卡被遭盜用 搵到「真兇」係舊同事

陳浚霆喺《愛‧回家之開心速遞》飾演龍家富二代風少，劇中經常被人攞著數，現實中嘅陳浚霆同樣被人佔便宜，佢早前亦喺社交平台透露被人盜用咖啡店儲值卡，嬲爆喺IG尋「真兇」，更講明唔排除報警求助。

陳浚霆早前亦喺社交平台透露被人盜用咖啡店儲值卡，嬲爆喺IG尋「真兇」。

陳浚霆喺社交平台表示近日發現有人喺銅鑼灣一間咖啡店不斷用佢嘅會員戶口消費，陳浚霆話「如果係你，請出聲！如果唔係，我就要報警，麻煩請幫忙」，陳浚霆相隔幾日受訪時表示事件非常離奇。
據知陳浚霆曾致電客服求助，好快就搵到疑似盜用者，陳浚霆坦言一直冇發現，直至最近買咖啡時，店員提醒佢有好多rewards，陳浚霆有啲好奇係咪買咗咁多杯咖啡，後嚟佢有一排儲值卡成日唔夠錢，入極錢都好快用晒，陳浚霆上網翻查先發現消費記錄好奇怪。

「風少」陳浚霆現實生活亦係富二代，其父係思科全球高級副總裁兼大中華區董事長陳仕偉。

陳浚霆一問之下先知原來「兇手」係一位舊同事，放上IG嗰陣有人認咗，指原來對方一直有用緊，連對方弟婦都用緊，令陳浚霆相當愕然，點知自己儲值卡嘅Code喺一個完全唔識嘅人手上，對方仲叫佢計番數，但陳浚霆根本唔知對方由幾時開始用，對方又聲稱唔知，令陳浚霆感到好無奈，認為此舉唔太禮貌同不負責任。
陳浚霆劇中經常被人攞著數，現實中嘅陳浚霆同樣被人佔便宜。