逆天奇案2｜麥玲玲放低羅庚槍戰群雄 張頴康研失常小動作有陰謀

由 陳展鵬 林夏薇 馮盈盈 黃智賢 蔣祖曼 張頴康 劉佩玥 方力申 同 高鈞賢 等主演嘅《逆天奇案2》。星期二一集，單元「殺手的終極任務」終於落幕，原來霍太( 麥玲玲 飾)因為炒燶股票要填氹500億，故請殺手以暗殺任務討好哈多爾富商巴金 ，希望藉此機會翻身！

平時笑面迎人嘅玲玲師傅，呢次演出嚴肅又有型，仲有槍戰戲份

不過當霍太帶同2名殺手同巴金見面時，先發現2人嘅終極目標原來真係巴金，殺手一見巴金就手刃對方，現場更隨即爆發槍戰！阿森( 陳展鵬 飾)、阿力( 黃智賢 飾)同口水言( 容天佑 飾)趕至，三人同殺手再次上演埋身肉搏，口水言更差點被殺手以鐵棍打死，好在莊家新( 董敬文 飾)帶同支援趕到現場擊斃殺手，口水言先逃過一劫，最終霍太因非法操縱股市同串謀謀殺被捕。

霍太搵殺手做大龍鳳，點知最後就搞出一個大頭佛

呢個單元玲玲姐演出非常突出，除以流利英語講對白，又親身上陣演出槍戰場口，攞槍動作仲可以話英姿颯颯，同平時形象穩重有極大反差，非常驚喜。呢集嘅追車動作戲同樣係焦點所在，本人曾任職警察嘅阿Ben黃智賢打戲連場，身手靈活，佢受訪時亦笑言：「平時都有做開運動，但係打戲時要即時度即時做，所以都幾有挑戰性，感覺都有少少吃力，因為有時要好短時間做啲動作 ，都有NG嘅，始終都打咗成日有啲攰，但都要盡量展現到角色嘅英勇。」

阿Ben又透露追車打戲拍咗足足一日，又特別感謝武指幫助：「武指偉師傅好好，佢會因應我哋體能度啲我哋做到嘅招式，拍出嚟效果好似好打得咁，但現場都知道其實有啲笨手笨腳。同 埋當時都拍得幾辛苦，因為天氣都好熱，依家睇到成果拍得咁好，覺得辛苦都係值得！」

而「口水言」容天佑同樣指呢場戲非常辛苦：「拍攝當日係台風前後，天氣好焗，未拍時已經身水身汗，啲動作又要擒上擒落起腳打，所以衫褲都畀啲汗啜到實晒，好難做到動作，同埋嗰日大家都有少少中暑跡象，好靚仔嗰個僱傭兵(莫浩峰)中埋暑添！」

天佑口中嘅靚仔僱傭兵 莫浩峰(Sebastian)亦被唔少觀眾大讚，「靚仔有型仔又打得」。34歲嘅佢曾演出多部電影、劇集同廣告，好似《拆彈專家》系列、劇集《飛虎》系列等，Sebastian唔止高大有型，更擁有商科碩士學位，絕對係四肢發達、頭腦同樣唔簡單！

扮演僱傭兵嘅莫浩峰有型又靚仔，其實佢參與過唔少演出

講返劇情可以話一波未平一波又起，警方喺暗網發現多條經高度加密嘅訊息，全部由上一輯 Big Boss 魏子樂( 張頴康 飾)失憶前發出，訊息內容包含「恐襲」、「報仇」、「香港」 等字眼，更牽涉數以十億計嘅加密貨幣！

調職心理服務課嘅阿Wing( 林夏薇 飾)往精神病院同魏子樂會面調查案件，因為大腦缺氧導致失憶兼精神失常嘅子樂變得瘋瘋癲癲，惟見到仇人阿Wing就突然「迴光返照」目露兇光，但轉頭又回復瘋癲狀態，行徑可疑。

雖然張頴康呢個Big Boss因為失常而被囚，不過似乎仍然會牽動新一輯故事發展

張頴康短短幾個鏡頭嘅表現，已將魏子樂瘋瘋癲癲嘅狀態演繹出心寒感覺，唔止連環「眼神 殺」嚇人，扭曲肢體動作亦非常可怕。阿康受訪時就指為今次角色準備唔少，更親自設計唔同少小動作加強感染力，好似不停眨眼、眼神飄忽、面部抽搐又不時發出恥笑聲咁，佢話：「聽完故事之後，我都諗咗一段時間應該點演，用咗兩、三星期去研究，同埋冇參考其他人嘅演出，因為我比較鍾意原汁原味去創作一個角色。」

轉任心理服務貨嘅 林夏薇 ，再見呢位宿敵又係咪有隱喻呢？

阿康又指今次演出甚有難度：「第一次認真諗點樣去設計角色，要諗埋角色背景、成長經歷加埋發生過嘅事去設計，對我嚟講係有難度。魏子樂係一個高智能罪犯，玩電腦、計數都好叻，點解眼睛成日喺度轉，其實係因為佢不停盤算緊一啲嘢，就算佢精神失常都係不停咁盤算，仲有不停發出恥笑緊嘅笑聲。」

《逆天奇案2》星期一至五晚 20:30 翡翠台