玲玲友情報丨笑稱與麥玲玲演夫妻係天注定 鄧梓峰分享黃霑往事令其受用至今

周身刀張張利嘅「十郎」鄧梓峰，應邀為麥玲玲、吳兆麟Alan、蔡景行主持嘅節目《玲玲友情報》擔任嘉賓，傾下「好男人唔係咁易做」呢個主題。
鄧梓峰擔任《玲玲友情報》嘉賓。

十郎同玲玲早前喺葉念琛導演嘅劇集《美麗戰場》入面飾演一對小夫妻，玲玲問到十郎點解葉念琛會揀佢哋演夫妻？十郎諗都冇諗就話：「我覺得係天注定，咁樣諗唔使challenge，我都好信佢選角。」𠱁得玲玲少女心湧現。之後玲玲又講到同十郎嘅相識，係緣於曾華倩主持嘅節目，佢話：「鄧梓峰係嘉賓，事後華倩話我『暗戀』佢，成日眼甘甘望住佢。其實係因為十郎講嘢慢，我要望實知佢幾時停，跟住接力講。」
二人喺劇集《美麗戰場》中飾演一對小夫妻。
主持經驗豐富嘅十郎，由《城市追擊》到目前播映嘅《關注關注組》都有份參與，佢主動提到與已故鬼才黃霑叔嘅合作令佢獲益良多：「嗰時我問霑叔寫歌詞點解可以寫到咁精警，佢話如果用10個字寫到嘅意思，就唔好用11個字去寫，多一個字都係多餘。」
十郎分享同霑叔嘅往事。
十郎接受訪問時提起霑叔兩件令佢印象非常深刻嘅往事：「有次同佢做籌款騷，有一項表演係要一班藝員，靠激發潛意識行一條火碳路。霑叔猛話無可能，要親自試。佢個份好學同好奇心，好值得學習。」另一件就係霑叔錄影 《城追》時讀錯字，將「星光熠熠(音揖)」讀成「接接」，原本可以選擇刪走片段，但佢堅持播出時親身同觀眾道歉更正，非常瀟洒。十郎回想故人時表示：「同霑叔閒談涉獵嘅內容豐富，佢係個非常有趣味嘅人，從哲學、宗教甚至愛情觀都可以傾。」十郎藉此砥礪一班J2ers，要豐富自己學識同人生，保持好奇心，對從事演員或主持工作，都有得著。
行仔同十郎合作主持節目《關注關注組》。
此外，同十郎合作主持節目《關注關注組》嘅行仔，接受訪問時讚對方主持功力深厚，仲話有十郎喺隔籬完全唔使驚講錯嘢，因為十郎轉數快會兜到，同時又可以好快整合到大家講嘅嘢，又可以將混亂嘅情況帶返正軌，令佢覺得相當安心。行仔直話視十郎為半個師傅，仲話雖然對方作為前輩，但都會同大家一齊試唔同嘅事物，又會一齊癲。

《玲玲友情報》逢星期三 22:00  J2 82台