「王子」被指酷似阿聯酋歌手Alira 表演片段曬驚人海豚音

被指同早前準備來港成立家族辦公室，又因家有要事需延遲計畫嘅阿聯酋杜拜統治家族成員
「阿里王子」，突然被傳媒指同當地歌手Alira外貌極之相似，更有傳媒利用AI技術比對於同一大學畢業嘅兩人相片，認為兩者相似度極高。

翻查網上資料，有杜拜傳媒2022年專訪時形容，Alira係當地嘅明日之星，呢位剛出道嘅新星2020年就曾喺當地舉行嘅世界博覽會演出，又曾同丹麥樂隊Michael Learns to Rock、美國搖滾樂隊Boyce Avenue等國際知名音樂單位同台，報道又指Alira有計劃於2023年舉行日本同美國演出。

今日唔少報道指Alira大唱菲律賓歌曲，不過據專訪報道，Alira唔止菲語了得，就連印度語、中文同日文亦一樣耍家。受訪時27歲嘅Alira稱，自從少年時期發現自己唱歌時男、女聲可運用自如之後，就一直練習，亦受幾位國際天后好似Celine Dion、Whitney Houston同Mariah Carey深深影響，出道短短兩年時間更以創作出超過廿首作品。