福祿壽訓練學院｜神還原「基嫂」靚女Dancer起底！ Naomi逆天長腿吸晴度爆燈

《福祿壽訓練學院》首播後引起唔少迴響，最令人意外嘅係，除咗三位導師同埋一眾優質又另類嘅參賽者爆之外，就連負責伴舞嘅Dancer亦成功一夜爆紅，佢就喺Opening表演中神還原「基嫂」嘅靚女舞蹈員Naomi喇！

Naomi無論髮型、外型、笑容同肢體動作都同「基嫂」形同倒模一樣，所以節目播出後，即時喺網絡引發熱烈討論，受歡迎程度絕對唔輸比「癡情基」王祖藍，網民除指「扮女友的小姐真係似到笑壞人」又話「個女朋友真係好似」外，更紛紛對靚女Dancer真身感到好奇！

Naomi被安排扮演「基嫂」一幕令觀眾笑爆又大讚激似

其實飾演「基嫂」嘅Naomi 2022年先正式加入舞蹈員生涯，3歲開始學跳芭蕾舞嘅佢，除已完成英國皇家芭蕾舞學院嘅專業資格課程，中五後轉往英國留學嘅佢，主修英、數、商同舞蹈，最後以3 A*獲得英國倫敦舞蹈學院London Studio Centre無條件錄取，並主修舞台劇。

入行時間唔算長嘅佢文「舞」雙全

據知原本「基嫂」戲份並無咁多，只係由於Naomi表現太出色，排舞師及製作組先決定臨時加戲比佢。而Naomi嘅社交平台當中，入行只得短短兩年時間嘅佢，演出經驗已經非常豐富，近期除咗曾為尹光演唱會擔任Dancer，早前又曾參與馬浚偉演唱會，更以Solo姿態同馬浚偉同台演出，相當厲害。

年紀輕輕嘅Naomi興趣相當廣泛，熱愛同三五知己四出打卡同旅行，亦鍾情跳K-Pop。雖然Naomi經常自嘲有肚腩，但觀乎佢上載嘅照片身形卻相當標準，一對逆天長腿更係相當吸引，水著、旗袍同誇張嘅舞台服飾都完美Carry。

Naomi曾參加過唔少演出

呢次扮演「基嫂」好評不斷，Naomi笑言要歸功排舞師：「佢竟然諗到我同基嫂似樣，但因為準備時間好短，所以我主要都係靠上網搵相學吓佢平時嘅身體形態同笑容。我係到拍攝當日先真正同『基哥』夾動作，當時都好緊張唔知應該做啲咩，但祖藍好好不斷提出我哋可以做啲咩動作去互動，令效果出嚟更好。」

社交平台又不吝分享好身材

Naomi續指節目播出後，佢成為唔少好友嘅「笑料」，Naomi說：「當晚我都有同班朋友一齊睇，佢哋一見到我出場就不停係咁笑，不停話真係好似。到第二日又有好多朋友打嚟話喺電視見到我好好笑，而且見到好多媒體包括IG同連登都有自己個樣，真係好驚訝，冇諗過呢個角色會咁受關注，真係非常感激製作部畀咗呢個演出機會我。」

《福祿壽訓練學院》星期日晚 20:30 翡翠台