一個好人｜江美儀將修甲技術融入義剪 親為長者打磨修甲畫面震撼

今晚播出最後一集嘅綜藝節目《一個好人》， 江美儀 分別拜訪咗義務為長者剪頭髮嘅傑仔(陳楚傑)、義務教授傷健人士潛水兼贊助裝備嘅Stephen(區紹堅)，仲有同埋為老人家義剪腳甲嘅貓姑娘(吳詠珊)。

傑仔小時候獲祖母灌輸要樂於助人，作為髮型師嘅佢利用專長技能、組織團隊為長者義剪務，美儀認為「窮得只剩下錢，內裡卻是空」也沒意思：「傑哥好幸運，有嫲嫲由細灌輸錢唔係我哋所追求嘅嘢，所追求嘅係幫助一啲冇能力嘅人，呢種快樂唔可以用錢買到。」

傑仔嘅嫲嫲自細就教佢要幫人，佢就決定以自己嘅專業為老友記義剪靚髮喇

潛水可令傷健人士喺水中嘅無重狀態有效鍛鍊肢體，潛水用品店老闆Stephen為國際傷健潛水協會(香港)名譽顧問，每月舉辦至少一次潛水訓練活動，除咗擔任教練，仲免費提供潛水裝備包括潛水氣樽，令傷健人士毋須負擔昂貴費用都可以享受潛水樂趣，同體驗水底傷健共融嘅世界。美儀喺節目中著上full gear裝備，同傷健人士一齊潛水，事後佢感觸表示：「傷健人士同普通人潛水完全冇分別，佢哋有好多障礙困難都可以克服到，其實我哋有啲咩咁難呢？」

愛好潛水嘅Steven唔止發展生意，更為傷健人士免費提供器材，等佢哋可以享受水底世界

另外原來唔少長者因難以彎身、視力模糊而未能修剪腳甲，導致發炎紅腫而寸步難行。善心美甲師「貓姑娘」因一次機緣巧合，為90歲婆婆剪腳甲後，了解到社會上有唔少獨居、隱蔽長者需要協助同關懷，2016年開始展開「義剪之路」。

由起初同客人、同事一齊義剪，直到而家每月定期同義工團隊舉辦義剪活動。回望數年前初辦義剪服務，貓姑娘透露曾遭社區中心拒絕，令佢一度感到氣餒：「好記得個姑娘話『我唔會攞啲長者對腳俾你玩囉』，我哋成班都係專業嘅美甲師，亦真係抽私人時間去幫長者服務，我都唔明白。」

所謂民生無小事，貓姑娘同一班同業就為老友記剪腳甲

貓姑娘除咗遇過感染灰甲嘅長者，最棘手試過見到一隻小昆蟲從腳甲裡走出來！疫情期間學懂修甲嘅美儀，將技能解鎖應用於是次義剪體驗中；其中一位長者因兒子忙於工作，至少3年無修剪腳甲，連碰一碰也感到疼痛，美儀細心為其打磨後分享感受：「你問我驚唔驚污糟，我真係驚㗎，其實好厭惡性呢件事。不過問題係，如果我哋都係咁諗嘅時候，咁呢班人點算呢？」佢勸大家多關懷身邊長者，並鼓勵大家每日至少抽5分鐘時間陪伴。

《一個好人》最後一集 今晚 22:30 翡翠台