鄭伊健澳門舉行演唱會 師妹黃淑蔓驚喜登場獻靚聲

鄭伊健澳門舉行演唱會 師妹黃淑蔓驚喜登場獻靚聲

「凍齡男神」 鄭伊健 日前帶埋小師妹 黃淑蔓 (Feanna)到澳門舉行演唱會,期間有觀眾熱情衝到台前,伊健又唱又跳又握手,仲向觀眾拋紀念品,氣氛High爆!

音樂會由兩位結他手演奏打頭陣,伊健升上台唱《Beautiful Day》揭開序幕,佢同舞蹈員勁歌熱舞《極速》同《全城效應》,觀眾亦一齊跳舞狂揮動燈牌,氣氛熾熱。伊健之後向大家打招呼,之後介紹音樂監製陳光榮:「今日唔只係『鄭伊健Together音樂會』,仲係一個音樂調查會,你哋知唔知我呢個朋友係邊個?佢就係陳光榮。我幾乎所有歌都係佢寫,佢除咗寫歌畀鄭伊健,仲係一位作曲家。我嘅歌、好多歌手嘅歌,仲有電影音樂,例如《古惑仔》、《風雲》,我以外嘅電影例如《無間道》啦!」

伊健喺澳門開騷再同好拍檔陳光榮合作

之後伊健邀請陳光榮、小師妹Feanna、歌手朱雋言同樂手到台前一齊獻唱《For U & Me》同《心照》,繼紅館同美國站演出之後,今次係Feanna第3次為伊健演唱會擔任表演嘉賓,仲獲驚喜安排獻唱新歌《I am All Alone》。

小師妹Feanna同朱雋言亦係呢晚嘉賓

伊健呢晚亦大唱《發現》、《同一秒》仲有《吻感》等經典歌曲,之後氣氛一轉,舞蹈員帶住大堆紀念品出場,伊健邊唱《Together》邊向台下觀眾拋出紀念品,令全場High爆。尾聲Encore時,伊健先後演唱《友情歲月》、《甘心替代你》、《只會因你唱》同《我的歌》,最後以《自動勝利Let’s Fight》滿場飛同觀眾握手,演唱會喺熱鬧氣氛下圓滿結束。

Feanna事後話:「今次係我出咗新歌之後第一次參與演唱會,伊健哥哥好好,喺我完全唔知情之下,綵排嗰陣安排我加入新歌,幫我諗埋出場環節,希望觀眾聽到我現場唱《I am All Alone》時會開心。」

Feanna第3次擔任嘉賓,仲爆伊健嘅暖男行為非常驚喜

佢又回憶早前跟伊健到美國演出最難忘:「我第一次去美國,除咗演唱會之外,大家都有帶我出去玩,竟然可以將工作建立喺玩樂上,係一件好幸福嘅事。我好想去更多地方,可以唱歌畀唔同地方嘅人聽。我成日問伊健哥哥下一站去邊度唱?佢唔肯講,話到時會通知我!」

一向鍾意玩嘅伊健,呢晚開騷亦如開Party一樣

 相關推薦

熱門搜尋