逆天奇案2丨炎明熹晒纖腰長腿跳唱《Little Magic》恨拍動作戲 陳展鵬趴車頂大晒驚人臂力

TVB熱播劇《逆天奇案2》逢周一至周五晚八點半翡翠台播映，噚晚（3日）呢集最大睇頭絕對係人氣王炎明熹（Gigi）驚喜客串！Gigi喺劇中演回本尊炎明熹，劇情講到Gigi為歌曲拍攝音樂特輯，警方收到線報指有黑幫會到現場搞事！O記森Sir（陳展鵬飾）及Nic Sir（黃智賢飾）奉命到現場保護。

昨晚一集有炎明熹客串演出。Gigi 大晒纖腰長腿跳唱《Little Magic》。

拍攝期間，Gigi保姆車失控衝向人群，場面非常混亂，最後智勇雙全嘅阿森開車截停保姆車先冇造成更大傷害。事件背後原來涉及駭客，意圖癱瘓香港交通；O記幾經調查終發現駭客藏身位置，可惜駭客預先發現O記殺到早一步逃去，阿森最終出盡九牛二虎之力成功逮捕對方。「動作擔當」展鵬於該場追捕戲再度大晒好身手，飛身跳上行駛中嘅汽車上，僅用兩手抓緊車頂，隨住暴走嘅汽車揈來揈去，展現出驚人臂力及腰力。

保母車被Hack，亂入粉絲群造成混亂。

Gigi噚晚呢集以青春打扮上陣，大晒無敵纖腰及修長美腿，跳唱《Little Magic》充滿青春活力！據知拍攝當日，Gigi拍攝逃走鏡頭時堅持要加邊走邊回望嘅動作，以確認粉絲安危，皆因佢覺得如果現實中發生同樣嘅情況，佢唔希望拋棄受傷嘅Gi炎粉不顧而去，足見Gigi充滿愛心及愛錫粉絲。官方釋出相關場口花絮片，Gigi拍攝「走佬」動作戲時竟然忍唔住偷笑，搞到NG收場，幕後忍不住問：「Gigi點解你愈跑愈開心嘅？」之後Gigi再度掩嘴偷笑，可愛指數爆標。

展鵬喺呢場追捕戲再度晒好身手，今次趴喺車頂揈嚟揈去都揈唔甩。阿森最終出盡九牛二虎之力成功逮捕對方。

其實拍攝當日遇上不少阻滯，皆因當日天氣非常不穩，一時曝曬一時下大雨，Gigi話：「今日天氣果然變幻莫測，第一次拍劇會冇啦啦落雨，然後又會冇啦啦好大太陽，然後出完太陽又落雨，又會突然好大風！」講到現場撞車場口，Gigi表示嘆為觀止：「見識到特技老師喺車上翻滾，真係好犀利！」工作人員問佢有冇興趣嘗試動作戲？Gigi爆料：「想呀，最近學咗詠春，但唔係學咗好多，希望有呢個機會！」

Gigi拍攝時忍唔住偷笑，搞到NG。 拍攝當日天氣好唔穩定，一時曝曬一時落大雨！

劇中Sweet到爆嘅情侶檔Nic Sir及Hazel（蔣祖曼飾）放閃無極限！噚晚呢集講Hazel大玩無下裝白恤衫誘惑，大晒修長美腿，佢與Nic Sir上演冧豬三部曲，分別係「愛的Back Hug」、「小鳥依人式撒嬌」與「纏綿坐大髀」，糖分嚴重超標！另強勢加盟《逆天2》嘅方力申，劇中飾演天才生物學教授唐冠峰，甫登場即大晒驚人魅力，被一班女學生圍住，之後冠峰仲協助警方盤問「大魔王」魏子樂（張頴康飾），同係高智商天才嘅兩人惺惺相惜，首次見面即以五角扭計骰瘋狂過招，相當精彩！

黃智賢同蔣祖曼上演冧豬三部曲放閃，甜度爆標。方力申同張頴康都係高智能天才。兩人以五角扭計骰過招，勁精彩。

《逆天奇案2》逢周一至五晚八點半翡翠台播映