張兆輝旅遊美食片引文旅局關注 新劇與相差28年女星上演父女戀

張兆輝繼早前喺驚慄電影《空心人》入面同王敏奕飾演夫婦後，最近佢喺內地劇集《夜色正濃》中，同33歲嘅內地女演員藍盈瑩合作，雖然佢哋年齡相差28年，但拍起感情戲時毫無違和感，甜到令人牙痛。
張兆輝與內地女星藍盈瑩《夜色正濃》中合作。
原來輝哥同《夜》劇嘅導演李駿甚有淵源，佢哋喺2014年曾經合作過一部電視劇，而劇集播出後唔只口碑收視雙豐收，輝哥更憑劇集喺內地人氣急升。講到今次夥拍年輕女演員，輝哥話新鮮感十足︰「王敏奕與藍盈瑩同樣是新一代公認演技好之人，所以拍攝時同樣充滿火花，一套是無奈嘅結局，一套是浪漫嘅結局，尤其藍盈瑩氣質好，能成功演繹出酒埸職業女性的氣場，加上現在很多年輕女子鍾意成熟的大叔，所以這種配搭也有一定的觀眾支持。」
輝哥同導演李駿甚有淵源。
向來寵妻嘅輝哥，喺《夜》拍攝期間，亦不忘趁空檔時間陪鍾意美食嘅太太四處遊玩同尋找當地特色美食。而為咗紀錄佢哋嘅美食之旅，輝哥化身旅遊達人，操刀拍片介紹各地地道文化美食同風景，6條旅遊美食片上傳後即被瘋傳，好快就累積逾5千萬點擊，更引起當地文旅局關注，文旅局仲邀請輝哥幫佢哋地區拍攝旅遊視頻，望借助佢嘅感染力推廣旅遊業。

同太太嘅美食旅遊片好受網民歡迎。
而喺《夜》劇完成殺青後，輝哥就已經投入新電影《無名火》嘅拍攝工作。
輝哥已經投入新電影《無名火》嘅拍攝。