逆天奇案2｜姜大衞為家人未來偷龍頭棍 劇中主角情路發展各異

《逆天奇案2》「龍頭棍風暴」單元落幕，原來偷走龍頭棍嘅真兇正係賀堅(姜大衞 飾)本人，目的原來係為咗孫仔！賀堅因為不欲黑社會背景影響乖孫嘅成長，所以設計一場大龍鳳將龍頭棍偷走，望打退囝囝賀永權( 林景程 飾) 爭做龍頭嘅野心，希望一家人移民到外地展開新生活。

姜大衞為家人清白發展，暗地偷走龍頭棍

可惜永權因權欲熏心執意爭做龍頭，仲同死對頭耀星( 翟威廉 飾)鬥生鬥死，兩人更喺貨櫃場打大出手，永權仲幾乎殺死耀星，好在森Sir( 陳展鵬 飾)趕到現場成功阻止悲劇發生。 

但係渴望成為龍頭嘅林景程，就因為爭權而同翟威廉火拼

林景程 同 翟威廉 嘅打鬥戲雖然只有1分半鐘，不過花絮片段見翟威廉以刀怒斬景程時，屋頂其中一塊假天花意外掉落下，仲啱啱擊中威廉額頭，幸未有大礙，稍作休息就重新投入拍攝。而拍攝當日正值33度高溫，身穿長袖服裝嘅佢哋既要狂奔，又要瘋狂埋身肉搏，兩人賣力演出拍到身水身汗，認真唔簡單。

拍攝期間現場假天花跌下，幸未有造成威廉受傷

劇中各主演嘅感情線亦係《逆天2》嘅重點，而星期五一集劇情，係Nic Sir( 黃智賢 飾)同 Hazel( 蔣祖曼 飾)翻撻後首過情人節，溫馨甜蜜滿瀉；至於同阿Wing(林夏薇 飾)分手嘅森Sir眼見街裏愛人一對對，自己就形單隻影自隊雙餸飯， 不禁黯然神傷！

重修舊好嘅Joman同阿Ben情人節撐枱腳非常甜蜜而甩拖嘅展鵬就弧身買兩餸飯

另一邊廂，阿Wing同天才生物學教授唐冠峰( 方力申 飾)喺大學邂逅，期間二人大談愛情觀，冠峰認為愛情根本不存在：「大腦分泌出愛情感覺，大概會喺一年半到三年之後，就會消失，但係呢段時間足夠畀人類完成兩性結合同生育，愛情只係基因繁殖機制。」

方力申扮演嘅生物學教授認為愛情根本唔存在

不過阿Wing就唔認同：「我覺得除咗基因繁殖之外，人類之間仲有陪伴同埋承諾， 呢啲都包括喺愛情。」冠峰之後再拋出大量學術術語反駁，直男指數爆晒表，但係阿Wing對冠峰就似乎產生出特別感覺！

飾演天才生物學教授嘅小方嘅角色理性大於感性，事事都以科學理論解釋， 仲連「愛情」都覺得唔存在，將角色嘅「直男特質」表露無遺。小方受訪時就透露靠幻想代入角色：「角色細細個就被老竇帶去荒島做科研，童年淨係讀書同做研究，我嘗試用屋企嘅情況套番落角色，如果我老竇淨係同我講運動，搬去一個地方淨係練水，日日都係咁練，我都會感受到呢個痛苦，用呢個感受代入角色。」

薇薇雖然唔同意小方嘅睇法，不過就似乎對佢慢慢改觀

講到劇中要面對大量繞口劖手嘅專業術語對白，佢就透露獲視后林夏薇傳授唔少秘笈：「薇薇教我可以錄低再翻聽，呢個方法啱晒我，因為每日都要揸成個幾鐘頭車，呢個方法好處係去到邊都可以聽，好似聽廣播劇咁，仲可以聽番感覺演繹得好唔好，如果唔鍾意呢個方法就再錄過，確實幫咗我好多。劇中有好多專業術語同埋英文，所以事前都要做足Research。」

劇中嘅佢直男指數爆晒表，而講到現實中自己嘅愛情觀時，佢就話：「感情方面唔係好識講。我覺得人大咗就會體會到，你覺得自己做得好時，可能人哋會覺得唔好，最緊要係對方覺得你係稱職嘅伴侶先係最緊要。」劇中佢不時會大顯廚藝，而現實中有冇同女友煮飯仔？佢就話：「大家都好忙冇乜時間煮嘢食， 同埋對食嘢嘅要求都好易滿足，煮熟就得。」

《逆天奇案2》星期一至五晚 20:30 翡翠台