率先睇！炎明熹生日前夕出新歌MV真眼淚爆喊 激罕與男主角鏡頭底下纏綿

聽日4月9號將踏入19歲嘅Gigi炎明熹，喺生日前夕推出全新作品《還有一艘救生艙》慶祝生日，今次新歌採用全新班底炮製，Gigi想喺新班底身上學習更加多嘅嘢，坦言第一次睇歌詞睇到喊，深深被內容好打動，Gigi希望為「Gi炎粉」帶嚟驚喜！
Gigi炎明熹全新作品《還有一艘救生艙》，4月8日晚上9時推出MV。

Gigi對新歌「一聽鍾情」，認為前奏部份畀人一種好遼闊同空曠嘅感覺，Gigi更喺MV奉獻多個第一次。今次MV故事講佢同男友長期分隔異地，但對方卻另結新歡，事件最終被Gigi發現，整個人心如刀割。導演要Gigi拎住手提電話，幻想同男主角對話，此時Gigi淚水決堤式滑落、雙唇不自覺地抖震，呈現被感情出賣嗰份痛。
今次MV故事講佢同男友長期分隔異地，但對方卻另結新歡。

Gigi拍MV時有一種纏綿、開心、幸福嘅感覺，感謝男主角Timothy帶佢入戲，自己都冇諗過會喊到出嚟，原來當時手機顯示嘅時間，亦觸動Gigi淚線神經，Gigi續道：「其實手機都有好大嘅幫助，因為當我想打電話嘅時候，個時間咁啱係『520』（國語：我愛你），所以一望到就喊。」
 最終被Gigi發現男友惡行，整個人心如刀割。

Gigi首次拍MV與男主角如此親密，雖然新歌係一首悲慘情歌，但導演加入大量二人甜蜜拍拖畫面，包括街上拖手擁抱、電話亭互餵蛋糕，遊樂場玩滾軸溜冰，最搞笑係原來Gigi與男主角Timothy從未玩過滾軸溜冰，兩人舉步難行，最後導演畀佢哋除咗對溜冰鞋，著襪喺場內「扮溜冰」，兩人先鬆一口氣，繼續喺鏡頭前展現甜蜜畫面，Gigi表示：「算係一個新嘗試，同埋大家投入咗喺戲入面，所以唔會覺得尷尬，或者有唔舒服嘅地方。」
 
Gigi與男主角Timothy從未玩過滾軸溜冰，兩人舉步難行。

至於在拍攝嗰陣，見到Gigi忍唔住笑，佢解釋：「其實我笑點比較低，我忍唔住笑唔係因為尷尬，係自己搞到自己笑，例如剛才我見到男主角出軌嘅訊息，對方留言話：Do You Want Me？再加埋個心心emoji，我一見到就笑咗，覺得好肉麻，同埋我平時影相，啲人叫我俾心心，我係唔會做，因為俾心心我覺得有啲尷尬，所以剛才一見到就笑咗出嚟。」
 最後導演畀佢哋除咗對溜冰鞋，著襪喺場內「扮溜冰」，兩人先鬆一口氣，繼續喺鏡頭前展現甜蜜畫面。

Gigi未拍過拖，但要喺MV內代入一段Long D關係：「原本我唔知Long D係乜，我唔知自己將來會唔會接受，但暫時我覺得係可以接受，因為未經歷過呢種情況，可能都係一個好處，因為日日見好快會厭，但隔一排再見就可以有新鮮感，大家不妨留言話我知，分享你哋嘅故事畀我聽。」
Gigi冇諗過會為「情傷」喊得出嚟，原來當時手機顯示嘅時間，亦觸動Gigi淚線神經。