李俊昊訪台急不及待食牛肉麵 期待再搞海外fans見面會

韓國男星李俊昊相隔半年再度到訪台灣，粉絲熱情不減，下晝三點開始嘅活動，有粉絲朝早六點就到現場霸靚位，親民嘅oppa非常識做，活動一開始就用國語同大家打招呼。oppa話自己好開心亦都好期待再同台灣粉絲見面。令oppa掛念嘅應該唔止粉絲，仲有台灣名物牛肉麵，oppa話自己ㄧ到埗已經急不及待食咗喇！

李俊昊近年成功由男團出身嘅idol，轉型為實力派演員，連續主演多套大熱劇集，仲憑《衣袖紅鑲邊》榮登視帝寶座，扮相宜古宜今嘅oppa，依家忙於拍攝漫改新劇，喺劇中佢飾演一位越有錢，超能力就越強大嘅異能英雄，雖然忙於拍劇，不過oppa都好期待可以再搞海外fans meeting，雖然未有確實日期，不過oppa就承諾大家，一有時間一定會再到台灣同大家見面呀！