連詩雅陀B七個月身型纖瘦 著高踭鞋出席活動獲老公批准

話咁快連詩雅已經懷孕七個月啦！呢日佢同彭秀慧一齊出席美容活動，雖然仲有兩個幾月就卸貨，不過Shiga身型依然好纖瘦，唔仔細睇根本睇唔出係孕婦，Shiga就話因為BB嘅位置比較低，所以冇咁顯肚：「我覺得BB好錫我，唔係好刻意去露佢出來嘅時候，佢就會好似收埋咗咁。」見到Shiga呢日仲著住高踭鞋，佢就會事先有同老公陳家樂報備，而家樂亦有叮嚀佢一定要搵人扶實。

七月預產期好快就到，不過Shiga同家樂兩公婆，對BB嘅性別依然好保密，對於有唔少網民猜測Shiga似係陀仔，Shiga就繼續大賣關子，話遲啲先會公佈。Shiga話自己陀B至今都冇乜唔舒服，不過可能因為之前自己經常煲劇到半夜，依家諗住校返正常作息時間，但一到半夜BB就會踢得好緊要，話BB可能已經習慣作息唔正常咁話呀！