伍允龍謝票遇魯莽觀眾「比試」 被踢再撞低仍保大將之風

新片《九龍城寨之圍城》1號正式上映，短短幾日已經衝破1500萬票房，氣勢強勁之餘，唔少觀眾都大讚當中武打場面非常精彩。而片中演員近日亦四出現身謝票，星期六雖然天氣欠佳，不過 林峯 胡子彤 張文傑 同 伍允龍 就繼續冒雨到唔同戲院答謝觀眾喇。

不過當其中一場完結之後，大家同觀眾互動期間，邀請一位中年男觀眾體驗Philp嘅吋勁時，呢位太過興奮當成係格鬥比試嘅觀眾，竟突然連起兩腳踢向Philp，連原本Phillp手持嘅書本都踢跌，不過Philp繼續帶笑執起書本，再輕易以吋勁將對方推開。

但係當雙方擊拳致意時，呢名觀眾又突然以膊頭將Philp撞低，絲毫未有準備嘅Philp一臉愕然，不過亦立即起身打圓場，風範十足，完全未有被呢名莽撞更認為自己「勝出」呢場「決鬥」嘅觀眾動氣，反而笑指自己真係唔識氣硬功，氣量十足下贏得更多現場掌聲。