譚旻萱拍廣告被嫌太惡死 入行後打波幾乎毀容嚇壞

被外界冠以籃球女神稱號嘅  譚旻萱 外貌標緻又高䠷，最近Mandy獲護膚品牌邀請，拍攝防曬用品廣告，就以打籃球為主題喇。Mandy喺廣告仲同男演員One on One較量，帶出防止UV嘅重要性。

當日拍攝時，Mandy一球在手就精神十足，全神貫注同對手對打，點知仲因為太忘形搞到面部表情太「狼死」而被嗌Cut，令全場大笑。

Mandy因為打波表情太惡死，而被導演嗌Cut令全場大笑

事後Mandy仲笑言：「每次工作要打籃球都會覺得唔似做嘢，係好開心嘅。最搞笑係導演覺得我打波個樣太凶狠，因為自己太投入冇注意到。」Mandy仲講起初入行後，一次比賽時幾乎毁容嘅回憶：「之前同啲叔叔打波，對方要護住個波，批踭批到我撞爆咗個嘴，當時好痛，仲有喊，但唔係因為痛而喊而係驚毁容，覺得自己會玩完，要另謀生計……好彩爆嘅係嘴唇入面，自此公司就嚴禁我打波打得太狠，其實打波習慣偏狼死，有啲難改。」

初入行時一次打波太肉緊令佢以為自己會毀容，仲擔心星途止步

最近Mandy為迎接新挑戰不斷增值，瘋狂做gym同跑步，又學戲同學武術，佢話：「為之後嘅工作做好準備，嚟緊會有新挑戰，一直上緊堂學嘢、勤力啲做gym，飲食都要節制吓，食得清啲，都想減吓磅，減吓而家嘅幸福包包面。」

近日佢投入增值自己，為之後嘅工作準備