少時秀英訪港獲粉絲熱情應援 衛詩雅與余香凝妹同場不尷尬

韓國少女時代成員秀英現身香港，同 衛詩雅 以及 余潔瀅 一齊出席首飾活動，大批粉絲到場擺位一睹秀英風采，秀英亦大方不時向大家揮心兼派心心，佢話有一段時冇嚟香港，喺機場見到粉絲接機時已經好感動，嚟到香港除咗想欣賞夜景、品嚐美食，最希望當然係想同粉絲互動。講到未來工作計劃，佢希望嘗識唔同角色，當中最想拍係動作電影。

衛詩雅早前被指原本演出電影《白日之下》嘅角色，最終變成余香凝飾演，兼錯失奪金像獎影后機會。呢日雖然同余香凝妹妹余潔瀅同場兼合照，衛詩雅都話絕對唔尷尬。身為珠寶鑑證師嘅佢又話自己對鑽石好有研究，豈不是做佢另一半咪好慘，因為送鑽飾時要好小心，衛詩雅話唔一定要卡數大，最重要係揀啱佢鍾意嘅切割方式。另外，早前同大師兄謝霆鋒合演新戲，佢為咗想獲謝霆鋒賜教，就扮唔識開槍，仲話成個拍攝過程都見暈，因為大師兄魅力太勁。