芷珊約您丨草蜢拒絕年齡限制思想跳到70歲 入行39年大爆入行初期表面風光

由黎芷珊主持《芷珊約您》逢星期日晚上9點半翡翠台播映。噚晚（5號）播出第三集嘉賓係組合草蜢，芷珊飛到台灣直擊佢哋喺高雄巨蛋演唱會，成軍39年嘅草蜢相隔30年再喺高雄開騷，三子 使盡渾身解數辣爆全場，氣氛熾熱。 

今集嘉賓係草蜢。

高雄巨蛋演唱會完騷後，芷珊與草蜢三子蔡一智、蔡一傑及蘇志威進行深度專訪。芷珊問到三子覺得10年後嘅草蜢會係點？蘇老闆直言唔會被年齡限制思想：「歷史都係人創造，你6、70歲仲喺上面跳，唔係唔得㗎喎！」傑仔大表贊同：「唔好畀自己太多阻礙同藉口，盡做吖，將自己發揮到最好為止。」芷珊再問到佢哋覺得而家快樂嗎？三子異口同聲覺得快樂，坦言入行39年嘅旅程充滿Amazing，傑仔諗番自己出道：「十幾廿歲到依家，好幸運我哋幻想出嚟嘅嘢都成為現實，仲要做得幾好添，所以好感恩。」阿智則說：「我哋三個係屋 邨仔之嘛，讀書仲係渣添啦，以前以為成功唔到㗎喇，但依家係做到Famous喎，講緊去到邊度都有人識你喎，嗰時係幾難想像。」

草蜢三子好感恩入行 39 年遇到好多 Amazing 嘅事。

草蜢三子應芷珊要求爆一個小秘密，三子大爆入行頭幾年曾有表面風光，其實非常窮困時期，傑仔坦言：「我哋開始出道攞咗新人獎，入行差唔多7年，之後都攞咗好多獎，喺出面其實都叫幾紅，但係我哋其實仍然係好窮，嗰時仲係住緊喺屋邨，好多隔籬鄰舍帶好多同學嚟睇，我哋真係冇辦法、瞓唔到覺，逼於無奈要搬出去，搬出去之後，我哋嘅錢只係夠買三張床褥，之後係咩都 冇。」 

講到好友大傻雪中送炭，傑仔都忍唔住哽咽。

傑仔感謝好友成奎安雪中送炭：「嗰時成日同大傻成奎安一齊出去玩，玩完之後佢送我返屋企，佢係要上嚟屋企坐，我話唔好啦，但佢死都唔肯，最終上咗嚟屋企，佢一打開門冇諗過我屋企係咁，就連一張櫈都冇，佢坐咗喺地下，佢話冇櫈坐啫，畀杯水嚟飲吓都得啩，我話對唔住，我屋企連雪櫃、 水煲都冇，當時我哋係窮到咁，嗰個年代表面係風光，內裏其實好慘，第二日大傻搵朋友送咗張梳化嚟畀我，係我屋企第一張嘅梳化。」傑仔憶起故人不禁哽咽：「好多謝大傻，雖然佢已經唔喺度，但我仍然好掛住呢個人。」

傑仔爆入行初期時表面風光，實質就窮到燶。

《芷珊約您》逢周日晚上9點半翡翠台播映