香港婚後事丨豹嫂胡蓓蔚暢談夫婦感情昇華至「粒聲唔出」 單立文稱畀錢老婆使係最浪漫

豹哥單立文同豹嫂胡蓓蔚結婚多年依然恩愛甜蜜，夫婦兩人作客全新清談節目《香港婚後事》擔任嘉賓，同大家暢談相處之道同感情保鮮方式，豹哥話夫婦之間感情就好似紅酒咁要發酵，而唔係只係想保存個狀態，其實係要昇華到另一個境界，佢再鬼馬形容「昇華到坐喺廳度，粒聲唔出，睇四個鐘頭電視。」豹嫂喺旁邊認同，仲要喺屋企用短訊溝通，一個喺廳一個喺房，百幾呎都用短訊。

唔好以為豹哥豹嫂鍾意喺鏡頭前互數，其實佢哋默契好好，只要一個眼神就知道對方意思，豹嫂話有一次豹哥喺活動做主禮嘉賓，當時台上有位嘉賓講完一段說話，佢就估到老公想講冷笑話，跟住佢就喺台下望一望老公，然後擰頭示意唔好講，原本想發言嘅豹哥就放低支咪。

豹哥豹嫂嘅夫妻相處之道，一集節目邊講得晒，所以嚟梗5月9號同10號連續兩集播出，夫婦兩人又談浪漫定義，豹嫂話而家唔需要好甜蜜，有時老公風趣都係一種浪漫。豹哥話浪漫係冇定義，有時畀錢使都係浪漫，豹嫂聞言即話：「無錯，而家開始，最浪漫嘅嘢就係老公畀錢老婆使。」豹哥仲話只要太太用心為自己去做一件事，已經係好浪漫，豹嫂指有時豹哥放工好攰，只係煮幾個餸佢食已經好滿足。