石原聰美產後回歸大銀幕作品 堅守7年前約定演頹廢媽媽

日劇女神石原聰美前年誕下第一胎後，近排終於喺工作上全面發力，最近喺日劇演檢察官，剪去一頭長髮，帶畀大家好多新鮮感，最近佢嘅新戲喺日本上映，呢日石原同導演吉田惠輔及拍檔青木崇高宣傳電影，呢部戲係石原產後復出大銀幕嘅作品，咁啱戲中出演孩子失蹤嘅媽媽，拍起上嚟感受特別深。

石原早喺產前經已同導演定下咗合作企劃:「七年前我直接找導演商量合作，接著三年後收到劇本，真的高興得跳起來，讀劇本時知道拍攝時會很辛苦，接著三年過去，即一年前我經歷懷孕產子，成為真正的母親後，去演繹母親的角色令過程更痛苦，但同時(作為演員感到)幸福得令我流淚。」石原懷著複雜心情拍攝，亦好期待觀眾對電影嘅反應。

而石原為咗打造戲中失去孩子嘅頹廢感，唔止犧牲一頭秀髮日日用番梘洗頭，為咗投入角色女兒失蹤嘅情緒，石原陷入精神崩潰嘅狀態，飾演石原丈夫嘅青木崇高都好佩服拍檔:「她剛成為母親，就要投入這樣的角色，畢竟是女兒失蹤的題材，我個人覺得她可以不接拍，沒必要讓自己那麼痛苦，但她沒有逃避堂堂正正面對角色，讓我非常感動。」