神耆小子丨蕭正楠演正骨中醫技巧高 與曹永廉一山不能藏二虎笑料百出

鄭則士、蕭正楠（Edwin）同冼靖峰等主演嘅輕鬆喜劇《神耆小子》今個星期登場，喺5月6號晚播出嘅首集經已爆出好多笑料，劇中飾演正骨中醫嘅Edwin極受街坊歡迎，呢幕佢幫病人正骨嘅戲，正正係佢同曹永廉喺劇中首次相遇。

平日兩人老友鬼鬼，喺埋一齊就笑料百出，Edwin呢日話唔知道阿廉有份開工，阿廉就質問佢有冇睇劇本，Edwin解釋原來阿廉個名寫喺臨時演員後面。原來佢哋喺呢套劇入面只係得幾場戲係同場，佢哋異口同聲話好事，因為一山不能藏二虎。

Edwin要應付正骨嘅場面一啲都唔易，好似一個踎底嘅動作，搞到Edwin抽晒筋。佢話現場有專業骨醫指導，加上太太黃翠如有睇開骨醫，所以有留意到骨醫正骨嘅技巧。首次跟鄭則士（Kent哥）合作，Edwin讚前輩好投入，好樂意畀意見新人，又會幫手執漏，所以有Kent哥在場，佢都會放心好多！