早D知早D醫｜林淑敏憶化療現脫髮副作用 張達明7年抗癌聽力受損四肢無力

由 洪永城 宋宛穎 何沛珈 同 魏韵芝主持嘅《早D知早D醫》，星期二播出嘅第8集，有乳癌康復者 林淑敏 分享抗癌經歷。2010年確診第二期乳癌嘅Mandy透露，當年因摸到乳房位置有硬塊立即求醫，經檢查後確診罹患乳癌。

事隔14年，Mandy對醫生當時嘅反應同說話仍然記憶猶新：「醫生開頭好樂觀，話『如果係水的話，幫你抽完就走得啦』，但照完超聲波後發現有少少問題。醫生好沉默，之後抽組織，第一針係『椰絲』，第二針都係『椰絲』，第三針……全場唔出聲，結果報告顯示患上早期乳癌。」

大小姐林淑敏回憶當年確診癌症嘅心情
 
確診後，Mandy曾經都怪過上天，但好在得到醫生鼓勵，加上努力維持樂觀正面心態，撐過為時多年嘅抗癌旅程。最終Mandy接受移除腫瘤手術，再接受4針化療、18針標靶治療注射，並每日到醫院接受放射性治療。Mandy更喺注射第一針化療後，開始出現脫髮副作用，頭皮更一度痕癢難耐：「痕到搞唔掂，自己抆甩佢（頭髮），一抆就甩，之後舒服晒。」

又分享治療期間自己嘅心情

Mandy亦自揭患病前飲食習慣相當不健康，愛吃雪菜肉絲餐蛋米粉做早餐，還自以為吃得清淡。現時就會自備健康餐開工，更養成良好跑步習慣。
 
而今晚(8號)播出嘅第9集，就有張達明分享對抗鼻咽癌嘅心路歷程。達明喺2011年確診前不時出現流鼻血症狀，但由於量少加上精神唔錯，就冇太為意，所以喺得知確診時，心情既驚亦心痛。而支持達明走過抗癌之路嘅，就係放眼睇得更遠、對世界有更美麗嘅期盼。

達明今晚會公開當年患有鼻咽癌嘅感受

喺長達7年抗癌路上，達明坦言會四肢無力及聽力受損，但佢亦鼓勵患病者及早求醫：「大家有病唔好太擔心，好好去醫治，好大機會康復。」本集更會介紹全港首部嶄新質子治療系統，主力治療頭頸癌（頸部以上的癌腫瘤，特別係鼻咽癌），避開正常組織做針對式治療，將副作用減至最低。

佢更奉勸大家一定要病向淺中醫
 
《早D知早D醫》逢星期一至三晚 22:30 翡翠台