五月天台上搞爛Gag 扮邀請四大天王任嘉賓

台灣天團 五月天 喺香港舉行嘅7場巡迴演唱會嚟到第5場，繼續開放畀歌迷點唱，但係主音阿信落咗台換衫，石頭就問大家想聽咩歌，當台下小朋友觀眾高呼《黑暗騎士》時，瑪莎同怪獸就話「唔好呀!」，佢哋提議小朋友應該要聽開心嘅歌，但得知小朋友堅持想聽嘅時候，佢哋就話冠佑識唱，因為冠佑號稱林口林俊傑，怪獸話同冠佑組團25年，首次見到佢眼神露出恐懼感覺，最後喺隊友鼓勵下，冠佑就開口獻唱。

五月天一向都愛搞爛Gag，就連正正經經唱一首《黑暗騎士》，都可以因為一句歌詞玩餐飽，佢哋唱出歌詞「呼喚黎明的出現」，就想整蠱觀眾話「讓我們掌聲歡迎，今天重量級嘉賓出來......沒有啦!」跟住佢哋又改唱「呼喚學友的出現」、「呼喚華仔的出現」、「呼喚郭富城出現」，跟住阿信就扮城城上身喺台上講嘢，氹得觀眾笑唔停。