小松菜奈產後復出宣傳 導演直認不敢直視眼睛

日本女星 小松菜奈 3月宣布為老公菅田將暉，秘密誕下第一胎，近日佢產後復出首度現身公開活動，為佢同 松田隆平 合作嘅新片宣傳，雖然小松着住鬆身西裝同長裙，但依然面尖尖，氣息相當好，仍然保持少女味。

電影講述一對失憶嘅男女，喺小島相遇嘅故事，兩人首度合作，小松話最初以為松田係個沉默嘅人，但接觸之後就發現對方有獨特嘅說話節奏，內裡又係一位搞笑嘅人，亦係好容易相處，畀人安心感覺。

松田讚小松好出色，佢哋喺佐渡島拍攝時，當時要坐船前往，而小松就拎住個袋，毫無架子，一個人去到拍攝現場，腳步輕快，係好爽朗嘅人。導演富名哲也就話睇中小松同松田外表唔似日本人，予人一種神秘氣質。導演又大讚小松實在太靚，到而家仍然未敢直視小松眼睛。