Tyson Yoshi被小S摸到極致尷尬 陳葦璇 葉巧琳舊衣翻著推動環保

Tyson Yoshi 陳葦璇 葉巧琳 呢日現身一個品牌店開幕活動，分享穿搭心得。最近Tyson Yoshi同好兄弟魏浚笙（Jeffrey）嘅共同興趣由齊齊嘆咖啡變成約埋揸車，作為新牌仔嘅Jeffrey已經被劉沛蘅 (Hillary Lau)爆過駕駛技術非常恐怖，令Tyson Yoshi呢日聽到傳媒轉述時都忍唔住大笑，雖然佢就話Jeffrey已經進步緊，但被問「敢唔敢坐Jeffrey車？」時，Tyson Yoshi就非常堅決話：「一定唔會坐佢車架喇！通常都係喺終點等佢。以Jeffrey技術而言，安全駕駛最重要，所以速度都係穩陣啲。」
 
Tyson Yoshi早前有份被邀請同小S徐熙娣拍攝綜藝節目，仲要一邊唱歌一邊除衫，大膽嘅小S仲摸到Tyson Yoshi嘅好身材，令佢不知幾開心。但係Tyson Yoshi就話自己前所未有咁尷尬過。
 
Kira、Mischa對時裝崇尚環保主義，二人都好鍾意用舊衣翻著方式做配搭，Mischa仲話為求著得返以前嘅牛仔褲而去減肥，Kira就話去美國學舞時見到好多人著熱褲著得好睇，所以都會特登做運動，令自己可以練出靚線條。
 
Mischa嘅愛貓早排離世，為紀念愛貓Mischa亦特登喺手臂紋上貓貓嘅樣，令貓貓用另一個方式永遠陪住佢。