揹名牌包扮問路後要求請食飯 港男竟然咁樣擊退對方？！

近日，有將軍澳街坊在Facebook群組上發文，分享疑似遇上「請食飯黨」的經歷。他指周四（25日）晚上約7時半，於區內的新都城二期商場遇到2名女子，兩人走近以普通話問他「寶琳邨點去」，他不以為意，好心指路後便打算離開，但女子「打蛇隨棍上」，再問他能否請飯。但是，樓主卻發現兩名女子「身光頸靚」，更手持名牌手袋，目測不似有經濟困難，因此用醒目方法擊退，先不慌不忙爽快答應請食飯的要求，令兩人以為得手放下戒心，繼而再取出手機拍下兩人的相片，「佢哋就拔足逃去」。
將軍澳街坊指，「挽住個LV唔知係A貨定咩，叫人請食飯，搵鬼信咩，裝過身先啦」、「有手有腳周街乞食，專揀啲老人家埋手」、「帶佢哋去賣咗個袋佢咪有飯食，三期個邊有間收袋㗎好似」；另有網民稱認出相中女子，指她們近日經常於區內流連，要求路人請食飯，並大讚樓主的處理手法，「做法正確，已經有一段長時間了，最主要是問你攞錢食飯」、「我在康城商場都遇到過，我一樣拎電話，佢9秒9走咗」、「近來將軍澳出現好多，前兩晚在坑口出現，鏟佢兩句即彈走，留意附近有冇男子同黨」。