TVB飲食節目《肥媽李鼎》，昨晚一集主題是「飲食秘方」，女士關心補血美顏，阿爺則巧製「豬膶魚雲羹」，女生們分享養顏心得。

談到年近70的肥媽皮膚依然滑溜，肥媽即分享秘訣：「凍水洗面，暖水𠺘口，熱水浸腳，特別長命，皮膚特別靚。」 「問題少女」游游繼續語不驚人死不休，在節目期間膽粗粗問鼎爺：「你唔好嬲我喎，你有冇搵過咩偏方幫自己生頭髮？」

鼎爺反問搵到而家就唔使光晒，鼎爺透露年輕時頭髮相當濃密，大爆曾經有人搵佢做小生， 惟後來經歷兩次意外先導致光頭，更大嘆只好認命！尾聲，游游不忘提點老人家護眼之道，還叫二人跟着做「游游護眼操」!

飲食節目《肥媽李鼎》來到最後一集，今集主題是「最多謝的人」。肥媽一邊製作「馬拉盞炒蕹菜」，話最想多謝已故林嶺東導對自己嘅知遇之恩，當年，肥媽自己在一間Disco唱歌，而林導就成日捧場：「佢覺得我把聲似黑人，之後叫泰迪羅賓作咗首黑人怨曲畀我唱，點知一唱周街啲人叫我 『嘥氣』，咁就入咗呢行。」肥媽分享與林導趣事：「佢嗰時晚晚好似返學咁，我每晚都會唱《We Are The World》，呢隻叫校歌，我就叫校長，嗰時好好玩，真係唔捨得。」

而鼎爺就一邊炮製「櫻花蝦XO醬爆龍蝦」，一邊剖白非常多謝珍姐曾勵珍，因為對方由自己做藝員到轉做烹飪主持，都是極力推薦自己，鼎爺話，即使自己有天大本事，但如果冇人畀機會都冇用！鼎爺又講返當年拍攝節目《阿爺廚房》時，前後經歷咗三次試廠：「真係試到我忟，覺得我眼神惡同聲氣大，前前後後試咗三次，其實佢好重視，如果唔係都唔會嘥錢試你呢個傻佬啦。」

之後鼎爺仲即場模仿珍姐招牌動作「睇吓點」，非常搞笑。