旅遊節目《約埋班Friend去旅行》,昨晚(27日)播出的第六集是「反黑團友」篇,張振朗、賴慰玲和朱敏瀚齊齊玩轉澳洲悉尼。
首站行程,三人去到著名景點三姊姊石打卡,之後他們有機會駕駛法拉利超跑體驗「速度與激情」,三人玩「河孖」決定誰有機會坐車,其間90後的朱仔竟舉手問甚麼是「河孖」,令賴慰玲愕然兼眼凸!最終振朗有幸駕駛法拉利,朱仔為座上客,賴慰玲則勁冇癮與工作人員坐旅遊巴。之後風水輪流轉輪到賴慰玲駕駛保時捷開篷跑車,振朗屈在狹窄的後座,朱仔則凍到打噴嚏,場面搞笑。
因合作劇集《反黑路人甲》結緣的三人無所不談,就連帶了幾多條底褲出Trip都攞出嚟講!事緣三人在高級酒店High Tea,振朗突然發表「底褲偉論」說:「其實呢個Trip我淨係帶咗兩條底褲。」聽到反晒白眼的賴慰玲說:「其實我見到你帶咗兩個篋,嗰啲嘢(底褲)有咁重咩?」振朗笑笑口解釋:「唔係重呀,因為我對佢哋珍而重之,想安放得佢哋舒服啲,所以一條一個篋。」他再笑謂:「我屋企都係得4條,我已經拎咗一半過嚟!」三人最終爆笑收場。
晚上三人入住森林中的木屋酒店,房價約1,300澳元(約6,500港元)一晚,三人參觀酒店房時睇到嘩嘩聲,朱仔見到超大廁所後笑言:「個廁所大過我間房!」之後三人到戶外飲酒,一邊睇星星一邊談天,朱仔坦言《反黑路人甲》「陸秋」一角改變了觀眾對他的睇法,他說:「嗰陣係好純粹、好focus喺角色上,嗰幾個月好投入,滿足感好大,感覺到自己係做得好,好耐未試過覺得自己係做得好。」朱仔還有感而發大嘆:「有時喺度諗,依家仲做唔做得番呢?」振朗聞言即開啟感性Mode眼濕濕說:「我都好肯定拍唔番,唔好拍第二集(季)喇,好嘅嘢好過咪算囉,但可以試吓拍其他嘅。」
約埋班Friend去旅行︱「反黑團友」分享《反黑路人甲》拍攝點滴 賴慰玲觀星下感觸眼濕濕
/public/article/images/202309/fc49db2e-440c-4bec-9f14-928634e93e46.jpg)