輕．功｜黎耀祥、蔣祖曼父女罵戰 反映兩代矛盾

台慶劇《輕．功》，昨晚一集黎耀祥、蔣祖曼（Joman）同場大鬥演技。劇情講到翊嵐（蔣祖曼飾）赫然發現眾人偷偷籌備媽媽繆妙（龔慈恩飾）的回顧展，有感展覽太過寒酸，翊嵐命令眾人「煞停」兼忍不住連番數落，十一（黎耀祥飾）見狀即扯火鬧爆：「大家為咗呢件事花咗幾多心機，你講嘢使唔使咁刻薄？有冇當過大家係長輩！」父女又因價值觀問題起爭執，事緣十一認為翊嵐不應因「移民問題」與拍拖多年的男友Duncan（李日朗飾）分手，但身為女強人的翊嵐卻不想因愛情放棄事業：「我唔係媽咪呀，做唔到嫁雞隨雞。」十一聞言再扯火：「咩呢種人嗰種人呀，佢生你架。」翊嵐即再反擊：「年代唔同咗，我有我生活，我有我事業，我唔一定要嫁人做少奶奶，我可以揀架。」。

祥哥與Joman的連場罵戰，背後意義發人深省，反映兩代人因價值觀落差衍生的矛盾之餘，其實忽略對方真正感受，令人反思。有網友認為：「兩代人的分歧，其實都係出於愛」、「呢套戲要有一定人生閱歷嘅人至會睇得出戲味」。提到劇中不時要對祥哥破口大罵，Joman直言很大壓力：「好記得開廠頭幾日就要指住祥哥嚟鬧，加上我第一次接觸小品劇已經好緊張，係咁諗點樣可以演好啲戲，點知諗得愈多就愈鑽牛角尖。龔姐同祥哥好好咁同我講：『唔使諗咁多，咁演就啱喇。』好感恩佢哋好願意同我分享。」