因為愛情｜夫妻因第三者介入離婚參加《好聲音》重遇關係解凍

由連詩雅（Shiga）主持、一連15集J2全新節目《因為愛情》，「為了愛情，你可以去到幾盡？」。節目中Shiga共訪尋了12個特別的愛情故事，當中有人放棄麵包，追求非一般的生活態度及愛情；有人花盡精力照顧三名小朋友，希望透過節目尋回戀愛初心、有人為愛情改變宗教信仰、亦有人示範了不離不棄的愛情。故事平凡卻不簡單，讓觀眾深深體會愛情偉大之處，
是可以跨越時間、地域甚或生死。

節目前晚（26日）首播，Shiga自言在每位嘉賓身上找到最大共通點，是既能經歷患難，亦能一起成長及互相包容。第一個愛情個案主角是Sarah和Rex，他們原先分別從事IT及市場營銷工作，是典型的中環上班族。由朋友演變成戀人的二人，緣份開始了便一發不可收拾，更因旅行這個共同嗜好一拍即合，二人的愛情起點相當轟烈，就是在30多歲之時一起裸辭，花了一年時間環遊世界、足跡遍佈30多個國家。

除了在拼搏之年裸辭夠晒經典，「SR夫婦」更打破了香港人努力上樓的傳統，不糾結於陸地上的磚頭，而是選擇在海上生活。長洲出生的Rex對大海有一份情意結，故當年回港後，膽粗粗在近乎傾盡家財的情況下買下第一艘船，並一步步開展二人的出租遊艇事業。為了生計及所追求及嚮往的生活態度，二人期間做過補習、餐廳、裝修泥水等工作，Rex在節目中坦言當時一度想過放棄︰「始終對屋企人要有交代，以前咁舒服又搵到錢，而家就要食公仔麵捱麵包，為乜呢？去到第三年特別難捱。」

憑藉信念、堅持及靈活變通，「SR夫婦」不但捱過困難漸入佳境，Rex將對自己影響甚深的長洲文化融入其獨特的海上事業，相當勵志。不過最後二人為了兒子，最終還是重返陸地選擇「上車」，進一步印證了父母的愛是何等偉大！

一連15集嘅《因為愛情》節目，今、明兩晚嘅愛情個案主角都同音樂相當有緣。今晚主角係先後殺入熱播綜藝節目《中年好聲音》100強同50強嘅離婚夫妻許兆銘(Samuel)同呂卓欣(Ada)，二人當時「同台」一度引起熱話。

《中年好聲音》播出時，Ada同Samuel關係疏離，但係齊齊亮相《因為愛情》，就有啲出人意表，Ada受訪時仲話同Samuel離婚後一度關係惡劣，愛笑嘅佢邊向著鏡頭扮鬼臉邊話：「曾經好憎佢架真係！」，至於Samuel則話：「憎還憎，但係冇尷尬過吖嘛。」

Samuel同Ada一家人當年樂也融融
「離婚」後再相處仍可以咁從容，原來全靠音樂。佢哋由相識、拍拖到結婚都同「音樂」有關，舊年因為參加《中年好聲音》意外重逢，當時同前夫鮮有交流嘅Ada仲激動哭成淚人，之後因為各種原因，佢哋重新嘗試交流，令已冰封嘅關係逐漸融化。

Ada同Samuel當年緣盡係因為第三者介入，Ada重提當日發現老公有外遇時不無傷感：「我記得我喊住搭巴士返屋企，好似個天冧咗落嚟咁樣。」仲話離婚對兩名女兒造成一定影響：「細女曾經問『我唔知點解人哋有爸爸，我冇爸爸。』小朋友都有懷疑自己係咪有嘢做得唔好而令父母分開。」

意外重遇之後，佢哋嘅關係開始解凍
因「第三者」問題令太太心淡離去嘅Samuel，喺鏡頭前亦淚眼表達對前妻嘅愧疚：「我一定有做錯，當初其實冇諗過要離婚。我好多嘢做得唔夠好，始終後生時會睇自己多啲。當初咁愛一個人，同佢一齊係希望每一日都令佢開開心心，但最後我做唔到。」

如今難得同Ada「冰釋前嫌」，一對女兒亦喜歡黐實自己，Samuel自然費盡心思修補關係，除咗安排烘焙樂親子活動，又巧妙安排街頭 Busking同昔日愛妻兼歌唱拍檔Ada重拾回憶，令 Ada再度哭成淚人，仲大嘆回憶湧現。

要喺愛情節目中訪問一對感情曾經破裂嘅離婚夫婦，主持連詩雅覺得震驚又尷尬，不過後來Shiga唔止對佢哋大表欣賞，仲回想起自身經歷而淚崩：「我自己都係過來人，所以都代入咗兩個囡囡嘅心情。Samuel話佢兩個女係一家人相處開心嘅動力，呢個畫面對於我嚟講好難再可以有。我都好欣賞Samuel同Ada可以擺低佢哋嘅仇恨，為佢哋兩個女去踏前多一步，希望畀番個完整家庭生活佢哋。」

Shiga嘅成長經歷令佢對Samuel同Ada嘅感情大有體會

至於11號晚一集嘅主角係視障鋼琴家李軒同太太Umi，自細因患有視網膜色素病變退化，至今只剩大約一成視力嘅阿軒，當初同Umi到底點樣開展「感情線」？佢哋之間嘅相處同一般情侶或者夫妻又會有咩分別？令人意外嘅係，阿軒喺屋企唔止擔當照顧者角色，仲為咗陪太太攀石下海大小運動樣樣做齊，當中嘅熱誠同真摯令人相當動容。最後一周節目同大家感受更多不一樣嘅感人愛情個案。