輕．功丨嵐嵐聞舊愛Duncan結婚崩潰何索忠奸之謎終極揭曉？

TVB台慶劇《輕．功》今晚9點半翡翠台播映大結局，噚晚講到十一（黎耀祥飾）係咪識「輕功」，終於揭開呢個最大謎團，十一向嵐嵐（蔣祖曼Joman飾）、阿風（朱敏瀚飾）及元植（鄭俊弘飾）坦白：「其實識輕功嗰個，係繆妙（龔慈恩飾）唔係我。」令眾人大為驚喜，背後原因更暗藏洋蔥。原來繆妙當年係為咗十一，先刻意隱藏自己識輕功真相。

十一向大家坦白輕功真相，原來識輕功嘅唔係佢，而係繆妙。當年片場大火，其實係繆妙用輕功救咗十一！

是集高潮落喺劇集尾段，凌波大廈突然失火，十一同阿風被困單位內，此情此境猶如當年片場大火，十一憶起當年與繆妙跳落城樓嘅情景；當年十一獨闖火場救出被道具壓住嘅繆妙，後來兩人被圍困喺火海中，十一危難關頭對繆妙講：「我攬住你跳落去，最多墊你屍底，一個死好過兩個死。」之後兩人相擁從城樓一躍而下，繆妙對於十一捨身相救非常感動，最後喺空中使出「輕功」兼情深望住十一，畫面浪漫。

原來繆妙當年係為咗十一，先刻意隱藏自己識輕功真相。最後喺空中使出「輕功」兼情深望住十一。

鏡頭一轉回到現實，喺起火單位發生爆炸之際，十一鼓起勇氣攜着阿風奮勇一跳，另在臨近結局周先出現嘅何索（龔慈恩分飾），一直忠奸成謎，根據噚晚佢向十一伸出援手劇情，唔少網民直指她「奸唔晒」，只係太過「目標為本」，到底今晚大結局係咪再有驚人反轉？密切留意今晚劇情！

凌波大廈失火，十一同阿風從高處跳下逃生，情境與當年片場失火相似。

今晚大結局同樣有驚喜，更有新元素—「天使的羽毛」登場，事緣十一等人喺大火後發現繆妙遺物，從中搵到繆妙留畀眾人嘅線索。「身份」神秘嘅羽毛喺眾人身邊「老是常出現」，最終眾人喺羽毛指引下，終成功尋獲繆妙臨終前留畀十一嘅遺言，內容更煞是感人。大結局另一看點，落喺嵐嵐同阿風嘅感情線上，嵐嵐舊愛Duncan（李日朗飾）回港結婚，更邀請嵐嵐出席婚禮，令嵐嵐陷入崩潰，而Yuki（朱晨麗飾）對阿風兒子照顧有加，阿風打算與Yuki結婚給予對方名份，但Yuki最終又會唔會答應？

今晚大結局，嵐嵐聽到Duncan話要返香港結婚。嵐嵐情緒崩潰，最終結局會係點呢？

感情要好嘅「洪家」，成員龔姐、Joman及朱仔早前開Live與粉絲互動，提到繆妙遺留下來嘅信息，龔姐透露：「嗰場戲我自己配音時都係咁喊，淨係對住劇本讀都覺得好感動。」令呢幕期待指數爆燈。

何索出手幫十一推咗高難度籌款活動，其實衰唔晒。

談到《輕．功》被指富教育意義，朱仔坦言拍攝《輕．功》對佢嚟講大有得着：「佢教大家要放輕心態去面對唔同事情，我喺拍攝過程真係抱住呢個心態去做，我好想有一個作品做到生命影響生命，呢套劇正正做到呢樣嘢。」 Joman坦言初時拍嘅時候係不斷懷疑自己、係咁諗點樣去演，反而係有一日突然諗番起個劇名，Joman即刻醒一醒：「呢套劇係輕功，點解要諗咁多、擔心咁多？」

龔姐、Joman同朱仔早前齊齊開Live分享拍攝感受。