有種好男人|一晚幾種不同喊法 李佳芯多層次喊戲「考牌作」演技獲肯定

一連20集劇集《有種好男人》,今(20日)晚將會播映大結局。

昨晚播出一集劇情緊湊,承接之前Woody(吳偉豪Ricco飾)遭匪徒錯誤綁架,蔣定天(張國強飾)又發現親生仔Terence(林正峰飾)相安無事,遂打算退出與警方合作的救人計劃。日正(馬德鐘飾)眼見勢色不對,情急之下跪地求定天「做好心」在匪徒面前幫忙圓謊……日正憑藉Woody提供線索,成功追尋至藏參地並救出Woody,只能穿着襪子逃亡的Woody,混亂間遭匪徒拋落山,日正背着他離開藏參地,二人感情邁進一大步。之後Woody被送往醫院搶救,原以為情況穩定,豈料突然發高燒兼腳部出現「壞死性筋膜炎」,隨時有被截肢可能……

談到為拍戲「唔着鞋」通山跑,Ricco笑言幸好有劇組貼心準備鞋墊護腳:「如果唔係(攝鞋墊)我都唔知點跑。對襪跑到穿晒窿,都換咗一、兩對襪,跑咗好多個shot。」他又指馬神比他更辛苦:「要佢孭住我,我都有啲唔好意思,仲要係行樹林啲凹凸位,好彩佢身手敏捷。」Ricco指昨晚及今晚的醫院戲份,對他來說很大挑戰:「我哋拍咗兩、三晚,每一場都好重情感戲份,令我深深體會到拍劇辛酸。」他又謂全靠馬神及Ali交足戲,拍攝喊戲時才如此順利。

除了Ricco,昨晚亦是李佳芯(Ali)考牌作,Ali短短一集挑戰多場不同層次喊戲,包括強裝堅強、擔心崩潰、心痛落淚、倍感安慰及放下心頭大石Mode等,其中一場Ali強忍奪眶而出淚水的場面,更是我見猶憐,不少網民予以正評:「表現到一個媽媽對兒子嘅愛,令人心痛」、「好真又有層次,唔同情景有唔同喊法」、「Ali幾場喊戲做得好好,面對不同情況同對象喊,演出都有唔同」。

Ali坦言不擅長喊戲,拍攝醫院喊戲時一度喊唔出:「有時因為瞓得少、休息唔夠,情緒更難收放自如,我記得今次醫院戲有試過喊唔出,但導演同工作人員好好,見我未Ready就調配場口就我,好多謝佢哋。因為冇得逼啲眼淚出嚟,我又唔想用眼藥水,想用真感情。」