TVB綜藝歌唱真人騷《中年好聲音》，進行第三部曲次回合《影視金曲生死鬥》，經過一輪激戰，鮑聖光跌落危險區，令人大跌眼鏡！以靚聲打響名堂的「鮑大人」鮑聖光獻唱陳百強的<一生何求>，惟表現跌晒 Watt，竟出現連環忘詞嚴重失誤，伍仲衡說：「一路聽都好辛苦，見到你又辛苦，我哋聽又辛苦，啲高音去唔到，係夾硬飆上去。」張佳添說：「唱甩歌詞唔係問題，甩咗旋律先係問題。」但肥媽則表揚鮑大人的執生功力：「你有樣嘢好，你作歌詞，真係要畀掌聲佢，唔係人人做到，你作都唔緊要，最緊要唱到落去。」曾兩度奪得五燈的鮑大人，最終只獲得61分，成為全晚最低分。

肥媽同車婉婉呢日率領《中年好聲音》嘅一眾參賽者作客《獎門人I Love爸爸感謝祭》，除咗肥媽同婉婉，眾人都係首次參予節目，難免大家都有啲緊張，不過肥媽就派定心丸，仲話會憑實力去取勝，仲話自己呢日着住波鞋上節目係嚟攞獎品同獎金呀！

周吉佩就話呢次上獎門人係再次夢想成真，因為佢一直都好想上獎門人試玩啲遊戲，而李思林就話因為預咗濕身嘅關係，所以已經帶定3套衫嚟換。劉智衡就話自己有唔少澳洲朋友都好鍾意獎門人呢個節目，而林鉫偉就話要玩到盡喇。身為獎門人忠粉嘅魏嘉信，自稱由小學已經開始練入面啲game，對佢嚟講零難度。

吉吉就話自己最想玩落大閘呢個Game，仲笑言因為李佳「口才了得」，所以好想同對方合作呢玩呢個遊戲，睇下其他組員估唔估到呀！

至於婉婉同伍仲衡率領嘅一組，就話未玩已經相當興奮，曹敏寶話自己喺屋企會掉高啲食物再去接返，從而當做訓練。顏志恒就表示自己喺屋企練啜紫菜，之後婉婉又話想睇伍仲衡同肥媽玩傳紫菜。

唔少女士都避之則吉嘅接cream遊戲，不過婉婉呢組嘅支嚳儀，就自告𡚒勇自薦去玩呢個game喇，而梁浩銓記話自己會負責頂晒所有飲品，令到婉婉讚嘆不已呀。