《愛·回家之開心速遞》｜炎明熹年初五驚喜「登陸」客串做自己 大講火星文超可愛

TVB處境喜劇《愛·回家之開心速遞》，務求每集都為觀眾及鐵粉送上驚喜，於剛播映的年初五一集，再送上驚喜彈！自出道以來人氣有增無減的《聲夢傳奇》第一季總冠軍「傳奇新星」炎明熹（Gigi），登場客串演出，Gigi在劇中將演回自己，演回萬人迷歌手一角，而Philip仔（梁禹勤飾）及技蘭（黃厚仁飾）向來視Gigi為女神，為追星出盡法寶，更會引發連串事件，這名小粉絲鬧出不少笑料，最終成功索得偶像簽名，期待值爆燈。

劇情亮點更是Gigi的簽名相，身穿中國服的她，韻味十足。她還於郵輪上獻唱<好想約你>。雖然Gigi只是輕鬆演回自己，演出片段亦只有數分鐘，但Gigi的傾力演出成功引起高度關注及支持！劇中Gigi除了以自己別具風格的說話節奏演繹角色外，又發放大量可愛表情包，網民大讚Gigi可愛，更有網民封Gigi為「星爺2.0」，一句對白「你好，請問你係邊到飛入嚟呢？」按照自己個性演活角色，完美表現她日常說的「火星文」！「炎明熹講話有自己嘅節奏，好有喜劇感，星爺2.0」、「好鍾意炎明熹講話個tone，佢有自己嘅節奏，有啲年輕時代星爺影子」、「其實Gigi好適合拍喜劇，佢個節奏完全就係天生喜劇人，渾然天成」。有粉絲指Gigi劇中角色與現實一樣好好禮貌：「Gigi真係做番自己，fans睇完佢表演問佢攞簽名，簽完後又係講『唔該』好好禮貌」。

一人分飾技安及技蘭的黃厚仁，昨晚可謂「忙個不停」，除了Keep住要轉換於「技安」及「技蘭」兩個不同身份外，在商場追星期間，分飾技蘭的厚仁更要力谷肚腩仔扮演「人肉彈床」，幫助Philip「一躍成名」成功吸引偶像Gigi注意；這一幕抵死的劇情設計，亦令「技蘭」成功入屋，贏盡焦點：「今集好好笑，技蘭嘅肚腩好圓」、「Philip仔跳技蘭個人肉彈床嗰幕真係笑到肚痛」、「技安一人分飾兩角，幾勁」、「希望技安/技蘭會多啲係宋家出現，今晚個組合好好睇」、「技蘭真的好鬼Q…...睇到就想笑」。

對於首度獲邀「登陸」《愛·回家》，Gigi坦言大感興奮，直認由小學時開始已是捧場客：「我有追開《愛·回家》，時間許可，會準時八點鐘喺電視面前觀看，佢哋嘅內容令我睇完之後好開心，每集又會帶出一啲信息，我覺得好生活化。呢個處境劇我係由細睇到大，小學時係《八時入席》，再到後尾有唔同系列。」Gig又指能與劇中角色真正合作，感覺既榮幸又夢幻：「真係不可思議，冇諗過以前甚至依家睇緊嘅劇，會有機會遇到佢哋（劇中角色），雖然有時喺TVB遇到大家，但唔會真係話傾偈嗰種。」Gigi續指，劇中最尊敬角色是丹爺，並爭取機會與對方合照：「我知佢做咗好耐《愛·回家》，好開心可以加入呢個大家庭，我見到佢哋好似屋企人咁相處，佢哋會互相叫對方阿爸、家姐或者阿妹，佢哋亦都好照顧我。」 

另外，Gigi大讚劇中道具相當像真：「我覺得有個好得意嘅地方，一直以為新威龍廣場係一個真廣場，然後Key個名落去，後來我知道原來係一個廠景，係特登搭出嚟，好神奇，同埋入面啲產品同店名都好得意，嗰個𨋢真係好真。」Gigi透露希望日後能多點拍劇，很喜歡和公司的幕後工作人員相處，皆因很有愛。

充滿童真的Gigi，訴說拍攝當日遇到兩名相當可愛的小朋友，很高興對方提出合照要求，Gigi當時還拿出兩顆朱古力氹小朋友開心，行徑與小朋友一樣可愛：「嗰日誤打誤撞帶咗兩粒朱古力，原本我想試吓個味，最後我就一人一粒畀佢哋食，啱啱好，Yeah！」