馬時亨 香港情｜親揭26歲封金像獎影帝及爭贏《情人》男主角真相

由馬時亨主持的綜藝節目《馬時亨 香港情》，周六（13日）晚播出的主題是「電影」，馬時亨邀來偶像梁家輝擔任嘉賓，暢談多年來與電影深厚緣份之餘，還會幫忙分享昔日電影小百科。原來家輝不但演戲一流，「講故仔」能力亦相當高，節目中家輝除親揭當年如何憑26歲之齡封金像獎影帝之謎，更會開心share與中國殿堂級演員劉曉慶合作點滴、當年何解被看中接拍《情人》躍身國際影壇、《監獄風雲》成功之道，及《東邪之毒》及《東成西就》兩套電影之間千絲萬縷的關係。

在節目中無所不談的家輝，一來即笑指自己是在現已結業的樂聲戲院長大：「我媽媽當年係樂聲戲院嘅接線生，我諗我滿咗月就喺嗰度大，到八歲都係喺戲院入面，間戲院我摸熟晒。」家輝續指當年在戲院中待得最多的地方竟然是女廁：「我成日畀人擺喺女廁，因為有女廁先有阿姨，又有張枱仔，咁我就畀人擺落個籃度。」

家輝又謂由於當年姨媽在同一戲院賣爆谷，故此除了定時定刻會被安排放於門口的爆谷機方便姨媽照顧外，亦因利成便食住爆谷大：「以前賣爆谷要同戲院分，每日戲院畀啲紙袋你，賣咗幾多紙袋係要返去同戲院分帳；咁我新鮮嘅冇得食，都係食嗰啲跌落底板嘅爆谷，我每日就揸住咁大包爆谷喺機底度係咁筆，就係咁食到八歲。」家輝另外還分享了小時候「暢遊」戲院畫房趣事，馬時亨聽畢忍不住笑言：「整定你入呢行！」