由王晶擔任製作人、鍾少雄監製的《一舞傾城》，昨晚（24日）終於播出焦點場口，劇情講到細細粒（鄺潔楹飾）有感連累Money（文凱玲飾）欠下周身債，遂答應陪練馬師上船過夜幫手還債，怎料練馬師有鋪SM癮，被綁在床上的細細粒慘遭練馬師蹂躪，最終導致遍體鱗傷。

Judy於相關場口將角色的恐懼、不安、崩潰等情緒演繹到位，令不少觀眾大感心痛。Judy坦言很緊張：「從演以嚟都未試過咁大尺度，事前都有做定功課參考一啲虐待戲應該點拍。」Judy續指一換上SM戲服已經入戲：「一上到張床鎖上個手扣，個不安感覺已經出咗嚟，對我嚟講好真實，呢場戲我係一秒都冇放鬆過，就連排戲嘅時候我都叫佢哋綁住我，因為我想攞嗰種感覺，同埋見到好多刑具喺現場，望落去已經好驚，我係用當下嘅情緒去做呢場戲。」問到事後有否陰影？Judy說：「都冇嘅，嗰日係我煞科戲，知道拍埋呢場就冇辛苦戲，之後嘅心情都有放鬆到。」

之後的落船崩潰戲，Judy坦言：「本身係擔心應付唔嚟，因為比較少做情緒化嘅戲，呢個唔係我嘅強項。拍呢場戲另一個難度，就係當時天氣有成37度，劇情係要我赤腳行落甲板，一踩落甲板已經好唔舒服，好似畀火燒咁，成個人癲咗，有啲位係嗌咗出嚟發泄，呢場戲最終兩Take就搞掂，當下演出嚟係最真實。」

TVB熱播劇《一舞傾城》自播出以嚟，吸引不少人追劇，陳法蓉、蔡潔、唐文龍、陳星妤、莊思敏、文凱玲、鄺潔楹、傅嘉莉及關楚耀等，呢日一齊現身宣傳活動，劇情每集有唔同話題，唐文龍澄清染髮扮老傳言，大讚陳法蓉保養得宜，唔需要刻意扮老！

劇中關楚耀、吳沚默、陳星妤及高鈞賢呢段四角戀漸入白熱化階段，吳沚默難忘怒摑陳星妤嗰場戲，為咗拍得逼真，被要求真打陳星妤，吳沚默拍「大婆打KK」呢幕，由於陳星妤避來避去，吳沚默只好趁佢反應唔到嗰陣，真係摑咗落去。

何浩文演渣男傷透蔡潔嘅心，最終惡有惡報被斬死，佢受訪時嫌自己角色下場未夠慘，而蔡潔喺最新播出嘅一集中，講楊明床戰蔡潔，原來拍呢場親熱戲當日，楊明女友莊思明咁啱喺同一個場地開工，莊思明笑言冇呷醋：「點解佢對住我冇咁激烈？日常生活太平淡，就咁嘅衝擊。」身邊嘅傅嘉莉聞言即爆笑，莊思敏則提議叫楊明喺屋企戴返個假髮，莊思明嗌action就會有！