一舞傾城︱蔡潔盲目為情甘願下海 目擊何浩文出軌終清醒觀眾拍手叫好

由王晶擔任製作人、鍾少雄監製的《一舞傾城》，上周五（26日）的重頭戲，落在蔡潔和何浩文的感情線上。

劇情講到「姑爺仔」Dave(何浩文飾)氹掂Monica(蔡潔飾)打本做生意，竟被Monica無意中發現出軌偷食，令佢大感心痛。自覺癡心錯付的Monica，終於決定攤牌講分手，但Dave竟無恥反斥Monica：「我一直都當你老婆，直到你做雞！」Monica聞言心死：「係呀，我做雞都係因為你呀！我班姊妹話我唔值得咁做，因為你係姑爺仔！」

Dave惱羞成怒下怒摑Monica，而暗戀Monica已久的志飛(楊明飾)見狀出手痛毆Dave。對Monica終於同渣男Dave分手，不少觀眾都拍手叫好！蔡潔笑言就指，留意到觀眾戥Monica唔抵：「見到有觀眾日日都問一次幾時分手，覺得好好笑， 大家都睇得好肉緊。」至於大家覺得佢癡心錯付，蔡潔就解釋：「其實Monica唔係白癡冇腦，每個戀愛中嘅女人都係盲目，只不過佢係好盲目咁解，佢同呢個男仔三年都知道佢咩人，只係佢選擇相信呢個人會改，呢個男人比較自私，但佢唔係唔愛呢個女仔。」

蔡潔很開心角色能夠獲得同情，至於有觀眾擔心Monica會黑化，她就意有所指：「睇吓大家點定義黑化，劇集後半段會有啲事情發生喺Monica身上，佢會有啲嘢改變。」