隱門｜黃智雯過份投入角色慘變生人勿近 一臉苦情反被讚成熟美

王心慰（Amy姐）監製的新劇《隱門》，昨晚（5月31日）一集，心月辛苦酬得的200萬於葉嘯天與阿Ray（陳展鵬飾）打鬥期間全數跌落海，同時亦因被奶奶（盧宛茵飾）及老公Mike（黃子恆飾）揭發借大耳窿慘遭公審。一波未平，見財化水的葉嘯天繼續逼迫心月，無賴地強行住在Mike遊艇之餘，並以「爆出二人關係」為由再向心月勒索鉅款，其間Mike殺上門，並揭破心月一直努力隱瞞的秘密…

雖然Mandy劇中經常一臉苦情，但網民相當受落，大讚她多了分成熟美、愈嚟愈靚兼角色有新鮮感。談到角色要同時面對衰老竇、衰老公及衰奶奶連環逼迫，Mandy笑言壓力爆煲，並指自己慘變「生人勿近」：「呢個角色一直唔可以坦率面對身邊人，身心靈又受到好大壓抑同威脅，其實係好痛苦。自己拍嗰時都放鬆唔到條橡筋，啲幕後話拍嗰時唔敢行埋我度。」Mandy又笑指遭吳岱融打出「真感情」：「拍衝突場口我哋大家都冇話特別留力，嗰種逼真感帶動到我反應更加真實，我覺得正嘅。」為了準備角色，Mandy更專誠上了一個短期心理學課程：「主要想了解番喺唔健康家庭成長、身心靈受創嘅小朋友，對佢哋日後成長有咩影響。」