唔經唔覺，《 聲夢傳奇 》（第一季）決賽已經過咗一年，估唔到個節目Rundown仲完好無缺咁貼喺電視城入面。時隔一年，Gigi炎明熹同Chantel姚焯菲喺《 香港金曲頒獎典禮2021/2022 》分別攞到女新人獎嘅金、銀獎，佢哋同一眾昔日學員喺張決賽Rundown面前重聚，分享喜悅，一齊合唱返當年嘅主題曲《 造夢時學會飛行 》。

#東張西望 #炎明熹 #姚焯菲 #聲夢傳奇 #香港金曲頒獎典禮 #詹天文 #冼靖峰 #鍾柔美 #孫漢霖 #文凱婷 #何晉樂 #潘靜文 #張馳豪 #蔡愷穎 #林君蓮 #林沚羿 #黃奕斌 #林智樂

由《聲夢傳奇》畢業生 何晉樂 林智樂 文凱婷 林沚羿 同《聲夢傳奇2》亞軍 黃洛妍 擔任主持嘅全新音樂節目《MUSIC BREAK》，上周起正式播出。幾位主持除咗為觀眾推介心水歌單外，亦會輪流喺個人IG開Live陪大家睇電視同傾吓偈。大家只要喺節目播出期間掃瞄螢幕上嘅QR Code，就可以同主持實時互動喇。

《MUSIC BREAK》嘅幾位主持，每晚都會為大家帶嚟唔同好歌

打頭陣直播嘅Rock就為大家推介陳奕迅嘅歌曲，直播期間Rock仲俾Fans即席點歌，Rock拎出結他自彈自唱《阿牛》時，有觀眾就搞笑留言：「你間房啲隔音得唔得架，咁夜彈結他會唔會被鄰居投訴，投訴指要入埋你間房現場聽。」

而星期二晚接棒嘅Felix，就同大家走入容祖兒之夜，Felix化身Fans開箱容祖兒演唱會大碟。 至於Aeren就向觀眾推介鄭秀文嘅好歌，獻唱《Chotto 等等》後仲有感而發，佢話：「我聽呢首歌時已經好大個，所以聽嗰時未必係心花怒放，而係有少少對愛情不安全感喺入面，好想同對方講，希望你依家對我嘅好唔係衝動，因為我想同你嘅關係係好長遠，所以要慢慢嚟。」

至於星期四晚嘅主持Janees就為大家送上歌神張學友嘅金曲，獻唱《餓狼傳說》時仲動作表情多多，非常入迷，Janees話：「我對呢首歌好有印象，因為我好鍾意扮動物聲，首歌入面嘅狼叫令到我好開心。」之後更隨即扮狼叫大晒真性情，最後又為大家獻唱「臨瞓版」《愛是永恒》。

擔任星期五主持嘅Venus就推介劉德華嘅歌曲，佢透露身為著名武術指導嘅爸爸林迪安同劉德華非常有緣，皆因佢哋同年同月同日出世。直播期間迪安哥个一度亂入，隔門獻唱劉德華嘅《暗裡著迷》，雖然未見其人只聞其聲，但仍獲唔少網友大讚唱功，仲力推佢參加周末就進行海選嘅《中年好聲音》呀。

Venus直播時Daddy迪安哥喺門外大騷歌喉，唔知有冇興建參加《中年好聲音2》呢？

《MUSIC BREAK》星期一至五深夜 01:35 翡翠台 / 星期一至五 09:30 J2 重播